Cope dalk gou in nuwe leierskapstryd
2011-06-06 09:23
Kaapstad - Cope kan hom dalk binnekort in ’n nuwe leierskapstryd bevind.
Dít nadat Smuts Ngonyama, die party se beleidshoof, gesê het hy sal dit “oorweeg” as hy formeel vir ’n leierskapspos benoem word.
’n Datum is nog nie vasgestel vir die party se verkiesingskongres nie, maar dit word tans in partystrukture bespreek.
Die Sunday Times het Sondag berig Mosiuoa Lekota, Cope-leier, kan dalk deur Ngonyama uitgedaag word.
Ngonyama het egter Sondag ontken dat daar ’n nuwe leierskapstryd broei.
“Ek is nog nie formeel deur enigiemand benoem nie.
“Ek wil nie die indruk skep dat iemand my genader het nie. Ek sal ’n benoeming oorweeg as ek genader word,” het hy gesê.
Volgens hom berei die party hom voor vir ’n leierskongres.
Phillip Dexter, partywoordvoerder, het vroeër voorgestel die kongres word in Augustus gehou.
“Enige bespreking oor leierskap is in dié stadium voortydig. Daar is nog nie eens oor ’n datum vir die kongres ooreengekom nie, so ons kan nie nou al praat van benoemings nie,” het hy gesê.
Cope word reeds maande lank deur leierskapsprobleme gekenmerk wat spruit uit onenigheid tussen ondersteuners van Lekota en van Mbhazima Shilowa, Cope se adjunkleier.
Die party se laaste poging om ’n leierskap te kies, het in Desember in ’n chaos geëindig.
Minstens 15 mense is beseer toe ondersteuners van Lekota en Shilowa mekaar met stoele gegooi en vuisgevegte uitgebreek het.
Dexter het twee weke gelede in ’n besprekingsdokument oor die stand van die party na afloop van die plaaslike regeringsverkiesing geskryf die lede moet oor die toekoms van die party besluit.
’n Verkiesingskongres moet as ’n saak van dringendheid plaasvind.
Hy het geskryf óf die party bestaan op sy eie voort, in welke geval die “radikale hernuwing” van die party nodig is, óf die party smelt met ander politieke formasies in die land saam.
“Die alternatief is dat ons die party se deure moet sluit en die einde van ’n belangrike, maar mislukte eksperiment in demokrasie erken.”
As besluit word om die party te red en om dit weer bekend te stel, moet ’n verkiesingskongres plaasvind.
Dit sal beteken dat alle partylede moet bedank en dat ’n geloofwaardige databasis saamgestel moet word.
Volgens Dexter is die dokument verlede week deur die nasionale werkkomitee bespreek en sal in alle waarskynlik vandeesweek in meer besonderhede daaroor besin word.
- Volksblad