Citrusdal se slim bobbejane is nou wêreldberoemd
2011-01-22 08:07
Die Burger
Kaapstad - Die Burger se berig oor die trop slim bobbejane van Citrusdal wat ’n nuwe sitruskultivar vir een van die land se voorste sitrusboerderye ontdek het, versprei soos ’n veldbrand.
Nadat die storie deur plaaslike nuusblaaie, radiostasies en televisiedienste opgevolg is, het die internasionale media daarmee op loop gegaan.
Dit het die verbeelding van die mense in die VSA, Engeland, Europa, Nieu-Seeland en selfs die Verre Ooste aangegryp.
Selfs in die vreemdste tale het mense verneem hoe die bobbejane vir A.L.G. Boerdery in die Bo-Olifantsriviervallei ’n nuwe minneola – ’n soort nartjie – ontdek het wat soeter as die ander is en boonop vroeër ryp word.
Dit was nadat mense op die plaas opgemerk het dat die bobbejane ’n spesifieke boom tussen duisende ander in die boord teiken en al die vrugte opvreet voordat die seisoen behoorlik op dreef is.
Dit blyk toe ’n nuwe kultivar te wees wat danksy spontane mutasie ontwikkel het.
Die man wat egter nou aan die kortste ent trek, is Alwyn van der Merwe, mede-eienaar van A.L.G. Boerdery, wat oorval word deur internasionale TV-nuusdienste, radiostasies en joernaliste.
Almal doen navraag,wil onderhoude voer of op die plaas besoek aflê.
Hy het self van ’n “baboon whisperer” gehoor wat raad gegee het hoe om bobbejane van ’n plaas te hou–teen ’n prys, natuurlik.
“’n Vrou het my uit Amerika gebel en haar verligting uitgepreek dat bobbejane se evolusie so ver gevorder het dat hulle nou nuttig vir die mensdom geword het,” het Van der Merwe gesê.
Die dag toe die berig verskyn het, was dit die naasgewildste berig op Die Burger se webtuiste.
’n Selektiewe soektog op Google vir “baboons discover new citrus cultivar” het Vrydag (gister) 8700 resultate opgelewer.
Tydskrifte wat hulle toespits op bewaring, natuurlewe, landbou, motors en reis het dit opgeraap.
Dit het ook gegons in blogs en op sosiale netwerke soos Twitter en Facebook.
Selfs webtuistes met name soos Treehugger, Naked Scientist en Facepinch het die storie gedra.
- Die Burger