Chuene klou aan sy pos
2009-09-24 06:47
Wilhelm de Swardt en Sarel van der Walt
Die atletiekbaas Leonard Chuene wat ná groot druk erken het hy het gelieg oor die Caster Semenya-sage, het gisteraand om oorlewing geveg.
Ondanks sy leuens klou Chuene verbete aan sy pos as president van Atletiek Suid-Afrika (ASA).
ASA se raad, wat vanoggend in Johannesburg vergader, is skerp verdeeld oor Chuene.
Beeld het gisteraand betroubaar verneem dat veral die suidelike atletiekprovinsies gereed is om ’n protesstem teen Chuene uit te bring. Gisteraand was daar egter twyfel of genoeg van die land se 17 atletiekprovinsies bereid is om hom af te dank.
Chuene, wat al sedert die eenwordingsproses in atletiek 17 jaar gelede president is, het ’n sterk houvas op baie van die provinsiale voorsitters.
Baie van hulle is danksy hom in hul poste.
Chuene en ’n afvaardiging van ASA het gistermiddag met Gwede Mantashe, die ANC se sekretaris-generaal, by Luthuli-huis, die ANC se hoofkantoor in Johannesburg, vergader.
Dit word beskou as ’n laaste en verbete poging van Chuene om die steun van die ANC te behou.
John Ncinane, omstrede voormalige ANC-LP en oud-vise-president van ASA, het glo die aanvoorwerk vir dié vergadering gedoen.
Mantashe het ASA se hantering van die Semenya-sage vroeër ten sterkste afgekeur.
Thabo Maseko, woordvoerder van die kabinet, het aan Sapa gesê die kabinet sal nie Chuene se bedanking vra nie.
Hoewel die kabinet teleurgesteld is oor die wyse waarop die Semenya-sage gehanteer is, moet sportorganisasies soos ASA self oor die saak besluit.
Richard Stander, uitvoerende hoof van Boland Atletiek, was die enigste administrateur wat amptelik bereid was om te sê dit sal ’n fout wees as Chuene as president aanbly.
Dié unie het gister ’n brief aan Makhenkesi Stofile, minister van sport, gestuur waarin Boland vra om teen Chuene beskerm te word.
Stander het gesê Boland is bang vir wat Chuene aan dié provinsie kan doen in ag genome die rol wat Wilfred Daniels en dr. Harold Adams van dié provinsie in die Semenya-sage gespeel het.
Daniels het as ASA-afrigter bedank uit protes teen ASA se hantering van die fiasko, terwyl Adams, ASA se spandokter, Chuene voor die Wêreldatletiekbyeenkoms in Berlyn vergeefs probeer oortuig het om Semenya aan die byeenkoms te onttrek.
Stander het gesê dit pla Boland ook dat Chuene al jare lank strydig met ASA se grondwet as president ’n salaris van dié organisasie ontvang.
“Chuene veg net vir Chuene, eintlik net vir sy salaris,” het Stander gesê.
- Beeld