Chris Barnard se 1ste vrou sterf
2011-04-25 07:01
Kaapstad. – Louwtjie Barnard, die eerste vrou van prof. Chris Barnard, die wêreldberoemde hartpionier, is Saterdagaand hier in haar woonstel oorlede.
Mev. Barnard, wat Aletta Gertruida Louw gedoop is en as “Louwtjie” grootgeword het, was 87 jaar oud.
“Sy het verlede week ’n beroerte gekry. Sy was vir die laaste twee jaar nie gesond nie,” het haar dogter, Deidré Visser, Sondag gesê.
In 1967 het prof. Barnard die wêreld se eerste hartoorplanting – op mnr. Louis Washkansky (53) – in die Groote Schuur-hospitaal in Kaapstad verrig.
“Sy was die vrou wat agter hom deur sy studies en navorsing gestaan het tydens die aanloop tot die hartoorplanting,” het Visser gesê.
“My ma was ook baie goed in naaldwerk en het ook my pa se hartkleppe gemaak.”
Die paartjie het mekaar juis ontmoet toe mev. Barnard ’n verpleegster by Groote Schuur was.
“My pa het altyd gesê sy het die mooiste oë gehad. Dit was juis die aantrekkingskrag,” het Visser gesê.
Volgens Visser was haar ma ’n baie private persoon en het sy verkies om uit die kollig te bly.
“My pa se woorde was altyd dat my ma nie genoeg erkenning gekry het vir die aandeel wat sy gehad het in die sukses van die hartoorplanting nie.”
Die Barnard-egpaar is in 1969 ná ’n huwelik van 22 jaar geskei.
Visser en dr. André Barnard is uit dié huwelik gebore. André is in die 1980’s oorlede.
Visser het die afgelope week langs haar ma se bed deurgebring.
Mev. Barnard het ’n woonstel met haar heeltydse omsieners, Vanessa Williams en Jean van Coller, en Henna Swart, ’n huiswerker, gedeel.
Visser onthou haar ma as ’n netjiese vrou wat altyd mooi aangetrek het, “twee uur lank haar make-up gedoen het” en geweet het wat sy in haar lewe wil hê.
“Sy was ’n sterk vrou, ’n baie sterk vrou.”
’n Gedenkdiens word op 6 Mei in Maitland gehou waarna ’n private verassing sal volg.
Sy laat Visser, vier kleinkinders en twee agterkleinkinders agter.
Volg Nuus24 op Twitter
- Die Burger
