Chirurg gebruik selfoonlig om operasie te doen

2012-09-11 12:30

Johannesburg – Mediese personeellede by die Chris Hani Baragwanath- akademiese hospitaal moes tydens ‘n kragonderbreking die lig van hul selfone gebruik om ‘n keisersnee te voltooi, het The Star berig.

Dr. Langanani Mbodi, voorsitter van Suid-Afrika se vereniging vir registrateurs, sê die krag het verlede week afgegaan terwyl dokters ‘n baba uit die ma se baarmoeder wou haal.

Mbodi sê die registrateurs (dokters wat opleiding kry om spesialiste te word) wat ten tyde van die kragonderbreking aan diens was, het hierdie inligting aan hom verskaf.

“Die ma was reeds oopgesny en die dokters moes die baba uithaal. Hulle kon nie ophou nie... die ma sou haarself dood bloei en die baba sou gesterf het,” het hy gesê.

Mbodi sê die dokters het flitse “en ander bronne van lig, insluitende selfone,” gebruik om die prosedure klaar te maak.

Jack Bloom, die DA se provinsiale woordvoerder vir gesondheid, sê dié kragonderbreking is die sewende een wat dié hospitaal vanjaar getref het.

Lees meer hier

Volg Nuus24 op Twitter