Chaos oor huise in Lenasia

2012-11-09 08:19

Johannesburg – 'n Groep inwoners van Lenasia-Suid betoog nadat hul huise deur die plaaslike regering verwoes is, het die polisie in Gauteng Vrydag gesê.

Die betogers in Uitbreiding 13 het Donderdagaand paaie versper en motorbande aan die brand gesteek, het ao. Kay Makhubela gesê.

Die betoging het Vrydagoggend voortgeduur.

Niemand is in hegtenis geneem of beseer nie.

Altesaam 37 uit 113 huise, wat volgens die departement van behuising in Gauteng onwettig gebou is, is gesloop.

"Ondersoeke deur die departement se eenheid teen korrupsie en bedrog het getoon dat bedrieërs verskeie erwe vir tussen R2 500 en 95 000 verkoop het. Vervalste titelaktes met die departement se amptelike kenteken, is ook aan die kopers gegee," het die Gautengse departement van behuising Donderdagaand in 'n verklaring gesê.

Die departement het gesê die sloping van die huise sal Vrydag voortduur.

Makhubela het gesê die polisie sal die betogings monitor.
      
– Volg Nuus24 op Twitter

- SAPA