Chaos in parlement oor wapens aan Libië
2011-03-24 07:32
Beeld
Kaapstad – David Maynier, DA-LP, is gister uit die parlement gejaag nadat hy by ’n minister wou weet hoe dit voel om “bloed aan sy hande te hê”.
Dit het tydens vraetyd in die Nasionale Vergadering (NV) gebeur toe Jeff Radebe, as voorsitter van die nasionale komitee vir die beheer van konvensionele wapens (NCACC), gesê het Suid-Afrika het wapens van meer as R80 miljoen aan Libië verkoop.
Hy het geweier om te sê of plaaslike vervaardigers verlede jaar ook 100 skerpskuttergewere en sowat 50 000 patrone daarvoor aan dié land verskaf het.
Dit het gebeur te midde van berigte van Libië dat kol. Muammar Gaddafi se magte besig is om ’n skrikbewind teen die Libiese bevolking te voer en dat sy skerpskutters mense in Misrata, die laaste westelike stad wat steeds onder rebellebeheer is, doodskiet.
Maynier wou by Radebe weet of dié skerpskuttergewere ook deel van die besending wapens was wat die NCACC goedgekeur het.
“As dit wel so is, agbare minister, sê ook asseblief vir ons hoe voel dit om bloed aan jou hande te hê,” het Maynier aan Radebe gesê.
Dit het ANC-LP’s laat ontplof. Adv. Mike Masutha het namens die regerende party kapsie gemaak.
Max Sisulu, speaker, het Maynier gevra om die opmerking terug te trek. Maynier het geweier, waarna Sisulu hom uitgejaag het. Die ampswag het hom na buite vergesel.
Volgens Radebe reguleer die Wet op die Nasionale Komitee vir die Beheer van Konvensionele Wapens sedert 2003 alle wapenhandel en word die besonderhede van alle transaksies in die NCACC se verslae uiteengesit. Dít word jaarliks aan die parlement voorgelê.
Radebe het aan die NV gesê die NCACC het 75 permitte vir die verkoop van meer as 9 000 artikels aan Libië goedgekeur. Dis onduidelik of dít in die vorige boekjaar of vir die tydperk sedert 2003, toe die wet gepromulgeer is, was.
“Artikels wat verkoop is, sluit in: valskerms, verskillende soorte patrone, nagsig-toerusting, laserbeheerde afstandvinders, haelgewere en gepantserde voertuie. Die totale waarde beloop R80,86 miljoen.”
Ian Davidson, DA-hoofsweep, het kapsie gemaak omdat Radebe nie die vraag oor die skerpskuttergewere wou beantwoord nie.
Sisulu het gesê omdat die oorspronklike vraesteller nie meer in die NV is nie, is dit Radebe se besluit of hy wil antwoord.
Radebe het besluit om nie te antwoord nie.
Maynier het gesê Radebe se weiering om duidelikheid oor die skerpskuttergewere te verskaf, plaas Suid-Afrika in ’n moeilike posisie: “Dit lyk nou of ons Ghaddafi eerder ondersteun.”
Toe die oproer in Libië uitgebreek het, het die Suid-Afrikaanse regering onmiddellik ’n verbod op alle wapenbesendings daarheen geplaas.
Die NCACC het ’n verbod geplaas op die uitvoer van wapens na enige land in die Midde-Ooste wat tans deur dreigende geweld geraak word.
- Volg Nuus24 op Twitter.
- Beeld