Chaos by ASA-raadsverkiesing
2009-11-21 14:55
Johannesburg - 'n Chaos het losgebars ná die Suid-Afrikaanse Sportkonfederasie en Olimpiese Komitee (Saskok) Saterdag 'n tussentydse raad vir Atletiek Suid-Afrika aangekondig het.
Die verkose tussentydse raad bestaan uit Alex Skhosana, James Mokoka,Hendrick Ramaala, James Evans, Daan Louw, James Moloi, Geraldine Pillay, Peter Lourens en Blanche Moila.
Lede van Sentraal-Gauteng Atletiek is nie in die vergadering toegelaat nie en sê die provinsie het nie 'n mandaat gehad om James Moloi vir die tussentydse raad te nomineer nie.
"Dit is 'n tydelike instelling, maar ons het die laaste sê," het Mems Moosa, sekretaris van Sentraal-Gauteng Atletiek, gesê.
Lede van KwaZulu-Natal het ook oor die syfers gekla, maar die voormalige naelloper Geraldine Pillay, het gesê provinsies kan steeds iemand nomineer en dat nog ses raadslede dalk by die nege wat Saterdag verkies is, kan aansluit.
Pillay kon die chaos wat deur provinsiale verteenwoordigers veroorsaak is, in bedwang bring.
"Ek sou meer voormalige atlete op die raad wou sien, maar as dié groep hard werk, kan ons die beeld van atletiek in Suid-Afrika herstel," het sy gesê.
Atlete het aangedring op minstens 50%-verteenwoordiging in die tussentydse raad van ASA, maar slegs vier van die nege verkose mense is of was atlete.
Die geskorste ASA-raad sal voor 'n dissiplinêre komitee verskyn oor hul hantering van die Caster Semenya-saga.
Saskok-raadslid Ray Mali het Maandag die administrasie van ASA oorgeneem en sal saam met die tussentydse raad werk om probleme by die federasie uit te stryk.
– Sapa