Chaos bars los in die parlement
2010-02-17 07:27
Liesl Peyper
Kaapstad - ’n Chaos het Dinsdagmiddag in die parlement losgebars, enkele minute nadat pres. Jacob Zuma repliek op die debat oor sy staatsrede gelewer het.
Cope, die DA en die OD het die raadsaal onder luide murmurering verlaat nadat die adjunkspeaker, Nomaindia Mfeketo, LP’s nie wou toelaat om haar op ’n punt van orde toe te spreek nie.
LP’s het warm onder die kraag geraak, veral nadat die minister van korrektiewe dienste, Nosiviwe Mapisa-Nqakula, beweer het dat Dianne Kohler Barnard, DA-LP, “F—k jou!” aan die adjunkspeaker sou gesê het voordat sy omgedraai en uitgestap het.
Mfeketo is Maandag in die debat oor Zuma se staatsrede gevra om ’n beslissing te maak oor ’n stelling van Mluleki George, Cope-LP, dat die ANC-regering Suid-Afrika na wetteloosheid lei.
Sy het Dinsdag haar beslissing voorgelees en aangedring dat George die stelling terugtrek. Sy versoek om haar op ’n punt van orde toe te spreek, is telkens verwerp, waarna hy botweg geweier het om die stelling terug te trek. “Dan moet u die nasionale vergadering verlaat,” het sy gesê.
Die DA se hoofsweep, Ian Davidson, het Mfeketo beskuldig dat sy spraakvryheid probeer smoor, omdat die Grondwet LP’s toelaat om hul standpunt sonder vrees vir vervolging te stel.
George en sy partygenote, sowel as die DA en uiteindelik ook die OD, het daarna uitgestap.
Die VF+, ACDP en IVP het agtergebly, maar hul ontevredenheid met die beslissing te kenne gegee.
Intussen het die ANC-hoofsweep, dr. Mathole Motshekga, in ’n verklaring die DA en Cope se gedrag veroordeel. ’n DA-verklaring, waarin die party eis dat Mfeketo haar besluit herroep, het spoedig gevolg.
- Die Burger