Chaos bars los in Kaapstadse middestad
2011-08-16 12:22
Kaapstad – 'n Chaos het kort voor middagete in die Kaapstadse middestad losgebars toe sowat 2 000 stakende munisipale werkers rommel in die strate gestrooi en die pad met brandende bande versper het.
"As hulle nie wil hoor nie, moet hulle voel. Ons sal nie terugkeer werk toe tot ons die verhoging gekry het nie," het Raymond Fredericks, 'n stakende werker, gesê.
Verskeie motors wat in Adderleystraat geparkeer was, se vensters is uitgeslaan en verkeer in die Kaapstadse middestad is ontwrig. Rommel was oral in die pad gestrooi en vullisblikke is ook aan die brand gesteek.
'n Ontstoke Jeremy Ruiters, wat blomme in Adderleystraat gekoop het, se bakkie se vensters is almal uitgeslaan. Ruiters het stakers in die pad getakel.
"Hoekom doen julle dit? Wie moet nou die skade betaal?" het hy aan hulle gesê.
Die staking deur munisipale werkers het Dinsdag sy tweede dag betree met die Suid-Afrikaanse vereniging vir plaaslike regerings (Salga) wat 'n loonverhoging van 6,08% aanbied, terwyl die munisipale werkersunie Samwu 18% eis.
Meer as 150 000 lede het Maandag landswyd begin staak.
Die ontlustepolisie is onplooi om die oproerige stakers uiteen te jaag. Kort daarna het die brandweer opgedaag om die brande te blus.
Tientalle nuuskieriges het in Adderleystraat saamgedrom.
Given Mtembu, 'n straatverkoper in Adderleystraat, het gesê die stakers "was heeltemal buite beheer" en het van sy voorraad gesteel."
"Daar was so baie van hulle. Hulle het net verby gekom en my goed gegryp. Ek het maar nou besluit om my goed te pak en te gaan."
Kapt. FC van Wyk, polisiewoordvoerder het gesê 13 stakers is in hegtenis geneem en is elk 'n boete van R500 opgelê.
"Die polisie sal die staking monitor en wet en orde handhaaf. Die polisie is op 'n gereedheidsgrondslag om enige voorvalle wat as gevolg van die staking veroorsaak is, te hanteer."
– Volg Nuus24 op Twitter
- Nuus24