Chanelle: 'Snellerman' se vrou, kinders vlug
2011-11-21 10:06
Pretoria – Die gesin van die geskorste konst. Gerhardus du Plessis, die beweerde snellerman in die sluipmoord op Chanelle Henning, het gevlug.
Hul verdwyning kom nadat 'n sesde verdagte verlede week in verband met die moord op Henning in die hof verskyn het.
The Pretoria News het by bronne na aan die ondersoek en die Du Plessis-gesin verneem dat sy vrou en hul drie dogters uit vrees vir wraak gevlug het.
Die polisieman het Dinsdag 'n bekentenis voor 'n landdros gemaak oor sy aandeel in die moord. Sy gesin word glo gedreig.
Kol. Neville Malila, polisiewoordvoerder, het Sondag gesê die gesin het nie beskerming van die polisie ontvang nie.
"Hulle het self uit hul huis getrek en woon saam met vriende. Ek kan nie sê waar of by wie hulle woon nie. Hulle probeer wegbly van die media omdat hulle nie hieroor wil praat nie."
Die 26-jarige Henning was in 'n bitter egskeidingstryd gewikkel met haar vervreemde man en miljoenêr-sakeman Nico Henning, toe sy doodgeskiet is oomblikke nadat sy haar seun Benjamin by die kleuterskool afgelaai het.
Du Plessis, André Gouws, 'n oud-polisieman en ’n goeie vriend van Henning se vervreemde man, Ambrose Monye, ’n voormalige Olimpiese atleet van Nigerië en skuldinvorderaar, Willem Pieterse – glo die eienaar van die motorfiets wat in die aanval gebruik is – en Preshan Singh, wat na bewering die rewolwer gesteel het en gebruik is om Chanelle te vermoor, in hegtenis geneem.
Deon Schoeman (20), wat glo die vuurwapen gesteel het, was teen Dinsdagmiddag ook agter tralies. Dié vuurwapen het blykbaar in Singh se hande beland wat dit glo aan die sluipmoordenaars verskaf het.
Malila het gesê Schoeman, wat nie in verband met Henning se moord aangekla is nie, kan ook aangekla word van die besit van 'n ongelisensieerde vuurwapen en ammunisie.
– Lees meer hier
– Volg Nuus24 op Twitter