Cézanne ‘verlig’ oor Dirk se vonnis
2010-02-03 12:36
Sonja Carstens
Pretoria.– Cézanne Visser, voormalige minnares van die bankrower Dirk Prinsloo, is verheug oor sy vonnis van 13 jaar tronkstraf in Belarus.
“Dit is vir haar ’n verligting dat hy nie skotvry daarvan afgekom het nie en dat hy nou vir sy dade moet boet, al is dit in Belarus,” het adv. Johann Engelbrecht SC, haar regsverteenwoordiger, gister gesê.
“Hy het soos ’n swakkeling van sy verhoor in Suid-Afrika weggevlug.
“Hopelik sal die vonnis die bose kringloop breek van verwoesting wat hy in vroue se lewens gesaai het.”
Engelbrecht beoog om volgende week in die hooggeregshof in Pretoria aansoek te doen dat die getuienis in Prinsloo se verhoor in Belarus as versagtende omstandighede in Visser se saak toegelaat word.
Sy verskyn weer op 8 Februarie in die hof wanneer Engelbrecht sal begin om deskundiges se getuienis ter versagting van haar vonnis aan te bied.
Visser is vroeër skuldig bevind aan onder meer die onsedelike aanranding van kinders en van bedrog.
Volgens Engelbrecht staaf van die getuienis in Prinsloo se saak Visser se saak.
“Dit kan aantoon dat Prinsloo ’n geweldige invloed op vroue uitoefen. Hy slaag daarin om beheer oor vroue se lewe te neem en hulle word soos klei in sy hande. Ek gaan ingevolge die wysigingswet op die bewysreg vra dat die hof ’n spesiale uitsondering op die hoorsê-reël maak en die getuienis toelaat,” het Engelbrecht gesê.
Visser se verweer is dat sy ten tyde van haar verhouding met Prinsloo só onder Prinsloo se invloed was dat sy nie as ’n individu kon funksioneer nie.
Volgens Engelbrecht is dit hoogs onwaarskynlik dat Prinsloo se minnaresse in Belarus van die getuienis in Visser se saak bewus sou wees. “Daar is geen manier hoe hulle hul bewerings kon versin nie en hul verhale toon ooreenkomste met dié van Visser,” het Engelbrecht gesê.
- Die Burger