Cele soek manne van staal
2011-10-07 09:08
Kaapstad – Groter klem gaan in die Wes-Kaap op sigbare polisiëring geplaas word danksy die 550 nuwe voertuie wat in dié boekjaar aangekoop gaan word.
Die Wes-Kaapse polisiehoof, lt.genl. Arno Lamoer, het Donderdag gesê dié nuwe voertuie vir die polisie in die Wes-Kaap gaan almal operasioneel ingespan word.
Lamoer het aan Die Burger gesê die voertuie is bedoel vir sigbare polisiëring, sowel as vir speurders in die Wes-Kaap.
Sy kommentaar het gekom nadat genl. Bheki Cele, nasionale polisiehoof, Donderdagoggend op ’n ontbyt met sakeleiers en lede van die gemeenskap in Khayelitsha gesê het die polisie het sowat R1 miljard vir nuwe voertuie begroot.
Cele het by dié geleentheid voorts gesê die polisie gaan vanjaar groter klem lê op die werwing van rekrute.
“Jy moet matriek hê, jy moet fiks wees en bowenal moet jy ’n skoon misdaadrekord hê.
“Geen misdadiger sal in die polisie aanvaar word nie,” het hy gesê.
Volgens Cele gaan hulle nog mense oorsien wat nie rybewyse het nie, maar nie diegene met misdaadrekords nie.
Hy het gesê die keuring sal strenger wees en die polisie sal nie meer tevrede wees met mense wat aansoek doen omdat hulle niks anders het om te doen nie.
“Ons soek mense in die polisie wat hier wil wees.”
Hy het gesê die dae is ook verby dat mense as reserviste by die polisie wil aansluit, maar dan tot die polisie toegelaat wil word of op betaling aanspraak maak.
“’n Reservis is ’n vrywilliger en vrywilligers word nie betaal nie.”
Volgens Cele is daar mense wat in die polisie wíl wees.
In die vorige boekjaar is 700 wetenskaplikes gewerf en vanjaar is 800 mense wat as wetenskaplikes gestudeer het in diens geneem.
Volgens hom is daar ook 28 mense met doktorsgrade in die polisie.
– Volg Nuus24 op Twitter
- Die Burger