Cele se pakkette nou bekyk
2011-12-01 07:00
Kaapstad – Nathi Mthethwa, minister van polisie, het interne ondersoeke gelas na die rits senior poste en goue handdrukke wat genl. Bheki Cele, geskorste polisiehoof, die afgelope twee jaar uitgedeel het.
Die ondersoeke behels die aanstelling van minstens 20 mense en die R31,2 miljoen wat die afgelope twee boekjaar aan skeidingspakkette bestee is om meestal van senior polisiebeamptes ontslae te raak.
Mthethwa het Woensdag in die parlement gesê dit blyk die beleid wat die nasionale polisiehoof magtig om beamptes in “uitsonderlike omstandighede” aan te stel sonder om normale aanstellingsprosedures te volg, is misbruik, asook klousule 35 van die Polisiewet waarvolgens beamptes op ’n vroeë ouderdom kan aftree of skeidingspakkette ontvang.
Benewens die interne ondersoeke het Mthethwa die spesiale ondersoekeenheid (SOE) gevra om ondersoek in te stel na onreëlmatige besteding vir die Nasionale Polisiedagviering in die Orlando-stadion in Soweto in Januarie, waar sowat 37 000 beamptes van oor die land heen saamgetrek het.
Tot R36,4 miljoen is aan dié dag bestee en ’n paar miljoen daarvan was onreëlmatig. “Die SOE het reeds ’n proklamasie vir die president voorberei en wag vir sy goedkeuring (om met die ondersoek te begin),” het Mthethwa aan die portefeuljekomitee oor polisie gesê.
LP’s was onthuts toe Mthethwa hulle meedeel die miljoene rande wat die polisie aan 19 skeidingspakkette bestee het, sal nie van dié mense verhaal kan word nie. “Hulle het dit nie aan hulself toegeken nie; hulle het daarom aansoek gedoen en dit is (deur Cele) toegestaan,” het Mthethwa gesê.
Volgens hom is daar ruimte om klousule 35 te “manipuleer” en moet die Polisiewet gewysig word sodat die minister voortaan ook sy goedkeuring vir skeidingspakkette moet gee.
Mthethwa het agterna aan die media gesê ’n interne ondersoek word gedoen om vas te stel hoekom die 19 beamptes skeidingspakkette ontvang het. “Hoewel dit voorheen (voor Cele se aanstelling) ook gebeur het, gaan ons net op dié groep fokus.”
Die tweede ondersoek fokus op die 20 mense wat sonder die gewone aanstellingsprosedures deur Cele bevorder is. Die modus operandi was om ’n pos te adverteer, die advertensie terug te trek en summier ’n aanstelling te doen sonder om onderhoude te voer.
Volgens Mthethwa sou dit nie vreemd wees as “een of twee” mense só aangestel word nie. “Maar as dit heelwat meer is, word dit ’n probleem.”
Lt.genl. Nhlanhla Mkhwanazi, waarnemende polisiehoof, het Mthethwa Woensdag vergesel. Toe hy gevra is wat sy indrukke van die polisie se nuwe “militaristiese” rangstelsel is, het Mkhwanazi gesê dit het nie veel aan die dissipline verander nie.
“Maar sonder bevel en beheer sal die polisie nie oorleef nie.”
Cele is verlede maand geskors hangende die uitslag van ’n raad van ondersoek na sy betrokkenheid by twee onwettige huurooreenkomste van sowat R1,8 miljard wat die departement van openbare werke vir polisiekantore in Pretoria en Durban gesluit het.
Volg Nuus24 op Twitter
- Volksblad