Cele ontken doodskietbevel
2011-04-20 07:02
Ficksburg - ’n Verergde genl. Bheki Cele, nasionale kommissaris van polisie, het Dinsdag met ’n gepunte vinger en ’n geïrriteerde gesigsuitdrukking heftig ontken dat hy ooit gesê het “die polisie moet skiet om dood te skiet”.
Sy ontkenning strook nie met vroeëre uitsprake van hom veral kort ná sy aanstelling nie.
Ure later het Cele op ’n nuuskonferensie in Kimberley vir polisielede geskerm en ook die media bygekom.
Op Ficksburg het Cele se verontwaardigde reaksie gekom toe hy en die adjunkminister van polisie, Maggie Sotyu, besoek afgelê het by die familie van Andries Tatane wat verlede week ten tyde van ’n massabetoging teen swak dienslewering deur die polisie met rubberkoeëls doodgeskiet is.
Ná die besoek is hy en sy span inderhaas hier weg Kimberley toe. Daar het hy op ’n nuuskonferensie gesê die polisie is nie huursoldate (“dogs of war”) nie en ook nie opgelei om dood te maak nie, berig Charné Kemp.
Op Ficksburg het Volksblad hom gevra om kommentaar omdat die mense van Meqheleng meen Cele moet deels verantwoordelikheid aanvaar vir Tatane se dood ná vorige uitsprake dat die polisie moet “skiet om dood te skiet”.
“Gee my een verklaring waarin ek dit gesê het. Bring vir my die klankgreep waar Cele sê die polisie moet skiet om dood te skiet. Ek het dit nog nooit gesê nie,” het hy geïrriteerd gereageer.
Cele wou ook geen kommentaar lewer op die Onafhanklike Klagte-direktoreaat (OKD) se ondersoek en of hulle vinnig genoeg opgetree het nie.
Op ’n vraag waarom die bevelvoerder van die polisie se eenheid vir openbare orde, waarvan ses lede in hegtenis is ná die Ficksburg-geweld, nie ook agter tralies is nie, het Cele gesê dit is alles in die OKD se hande.
Net ná sy gesprek met die media het ’n omgekrapte Cele van die huis van Tatane vertrek.
Hy het vroeër sy meegevoel aan die familie en vrou van Tatane oorgedra en gesê die mense se ontvangs maak hom nederig.
“Ek het nie geweet wat om te verwag van die familie nie, maar ek het vandag ’n paar dinge van hulle geleer. Hierdie is mense met goeie harte.
“Baie mense het gevra: Waar’s Cele? Hoekom kom hy nie Ficksburg toe nie? Maar ek was weg en het Vrydag eers weer in die land gekom.
“Ek het so gou moontlik na Ficksburg toe gekom.”
Hy het Tatane se dood as ’n jammerlike voorval beskryf en gesê dit moes nooit gebeur het nie.
“My wens is dat Andries Tatane se bloed die laaste in so ’n voorval moet wees.”
Net voordat hy uit die huis gestap het, het Cele R350 aan die gesin oorhandig. Sotyu het R400 bygedra en nog een van die afgevaardiges het R200 aan die familie gegee.
’n Suster van Tatane, Sarah Bani, het gesê hulle sal die geld gebruik om vir Tatane se seuntjie, Molefi (4), iets te koop.
Sy sê hulle was verbaas oor Cele se koms.
“Ná alles wat gebeur het, het ons nie gedink hy sal opdaag nie. Hy is ook ’n moeilike mens om mee in kontak te kom, so ons is verbaas en bly oor sy besoek.
“Dit maak niks reg nie, maar dit laat voel ons darem dat baie aandag aan Andries se saak gegee word.”)Einde verlede jaar is berig dat Cele ook aan die media gesê het hy het nooit die spesifieke woorde “skiet tot die dood toe” gebruik nie.
Volgens hom het hy vroeër gesê “die polisie moet dodelike optrede gebruik”.
In 2009 het verskeie joernaliste wel berig daaroor dat Cele op ’n nuuskonferensie gesê het hy staan by sy vroeëre “skiet tot die dood toe”-uitspraak.
Verskeie Engelse joernaliste het daarna na hom verwys as Bheki “Shoot to kill” Cele.
Kort ná sy aanstelling het Cele die parlement versoek om art. 49 van die Strafproseswet te verander sodat polisiemanne vinniger en beter van gewelddadige misdadigers ontslae kan raak.
- Volksblad