Cele maak misdaadteiken 3% laer
2010-02-25 06:51
Lizel Steenkamp
Kaapstad – Die polisie het die teiken om ernstige geweldsmisdaad jaarliks met 7% tot 10% af te bring, stilletjies verlaag.
’n Amptenaar van die nasionale tesourie het gister in die parlement gesê komm. Bheki Cele, nasionale polisiehoof, het die persentasies hersien omdat die polisie die laaste paar jaar nie die hoër teiken kon haal nie.
Die polisie onderneem nou om misdade soos moord, verkragting, kapings en rooftogte by huise en ondernemings elke jaar met tussen 4% en 7% te verminder.
“Die nuwe teiken is laag. In ag genome die gewelddadige aard van ons misdaad dink ek nie die breë publiek gaan hiermee gelukkig wees nie,” het Rendani Randela van die tesourie se afdeling vir openbare finansies aan die portefeuljekomitee oor polisie erken.
Die nuwe teikens is aan die nasionale tesourie deurgegee ter voorbereiding op nasionale departemente se begrotingsredes.
Dit beteken Cele en sy beamptes kry vir die 2010-’11-boekjaar tot R5,5 miljard meer om makliker teikens te haal as in die vorige boekjaar. Sindi Chikunga, ANC-LP en komiteevoorsitter, het onderneem om Cele na die parlement te ontbied om die besluit te motiveer.
Tot 38% van die polisie se begroting – dit is byna R21 miljard – is vir sigbare polisiëring bedoel. Tans magtig wetgewing die polisie om tot 8% van dié geld (dit is sowat R1,7 miljard) vir ander doeleindes aan te wend sonder om die tesourie se instemming vooraf te kry. Sowel die ANC as die DA meen dit is ongehoord. “Ons moet seker maak die geld word gebruik waarvoor dit bedoel is,” het Annelizé van Wyk, ANC-LP, gesê.
Voorts blyk alles nie pluis te wees met die tenderprosesse wat die polisie volg nie.
Cele het die ouditeur-generaal (OG) se kantoor versoek om ondersoek in te stel na beweerde ongerymdhede na sekere tenders wat toegeken is. Die OG wou nie meer besonderhede bekend maak nie, maar het wel bevestig die ondersoek sal teen Mei afgehandel wees.
- Beeld