Cele braak gal oor ou landsvlag
2009-12-09 08:27
Dries Liebenberg
Durban. – Komm. Bheki Cele, nasionale polisiehoof, het gister ontstoke gereageer op ’n ou landsvlag op ’n lessenaar in ’n Metrorail-kantoor.
Cele en Nathi Mthethwa, minister van polisie, was in die stad om die polisie se misdaadbekampingsplan vir die vakansie bekend te stel.
Mthethwa het op pad na ’n konferensiesaal in die Durbanse spoorwegstasie vasgesteek toe hy die vlaggie op ’n lessenaar van ’n junior Metrorail-bestuurder gewaar het.
Hy het Cele dadelik nader geroep. Dié het vir die vrou wie se kantoor dit is, gevra wat die vlaggie op haar lessenaar soek.
Met ’n groot weergawe van die nuwe landsvlag wat teen die muur bo haar pryk en ’n Sharks-vlag in die venster, het die vrou stilweg geantwoord dis vir haar iets moois.
“Dis buite orde!” het Cele uitgeroep en opdrag gegee dat daarop beslag gelê word.
Nadat die vrou gesê het sy is baie jammer, het komm. Bongani Ntanjana, adjunkhoof van die polisie in KwaZulu-Natal, die vlaggie verwyder.
Volgens Dumisani Dube, streekbestuurder van Metrorail, was die hoof van die finansies-afdeling waar die vrou werk nie bewus van die ou landsvlag in die kantoor nie.
“Daar sal ondersoek ingestel word met die oog op korrektiewe stappe,” het hy gesê.
Mthethwa en sy adjunk, Fikile Mbalula, was saam met Cele en die provinsiale polisiebestuur deel van ’n groot magsvertoon deur Durban se strate met die boodskap dat die regering ernstig is in sy “kruistog teen misdaad” dié vakansie.
Nadat komm. Monnye Ngobeni, KwaZulu-Natalse polisiehoof, ’n afskrif van die provinsie se misdaadplan aan Cele oorhandig het, het Mthethwa moord, roof en kapings as spesiale fokuspunte uitgelig.
Min is egter oor KwaZulu-Natal se plan bekend gemaak.
Dir. Phindile Radebe, provinsiale woordvoerder, het net gesê 20 000 polisielede gaan ontplooi word, polisiëring gaan by strande verskerp word en die taktiese reaksiespan gaan teen rooftogte en kapings gebruik word.
- Beeld