Cele: Selfs Jesus had misdaadprobleem
2011-04-02 07:33
Johannesburg - Genl. Bheki Cele, nasionale polisiehoof, het Vrydag die polisiemag met Jesus Christus en die 12 apostels vergelyk, asook ’n vergelyking getref tussen die polisie en God en Adam en Eva in die tuin van Eden.
Cele het Vrydagoggend op ’n motor-oorhandigingseremonie in Pretoria gesê as Jesus en God misdadigers in hul midde gehad het, sal dit te wagte wees dat daar misdadigers onder die 193 000 lede van die polisie is.
Terwyl Cele gepraat het, het tientalle polisielede wat die geleentheid bygewoon het, geskaterlag omdat dié vergelykings vir hulle snaaks was.
“Jesus Christus het ’n organisasie van 12 mense gehad,” het Cele gesê.
“Onder daardie 12 was daar ’n misdadiger wat elke dag saam met Jesus gesit het.
“Selfs toe Jesus hom (Judas) tereggewys het, het hy ontken dat dit hy was wat die misdadiger is. In die tuin van Eden was daar twee mense. God het self elke oggend inspeksie gedoen.
“Een dag toe kry Hy hulle nie. Hulle het weggekruip, want hulle het ’n misdaad gepleeg.
“As jy misdadigers onder twee mense gaan kry, sal jy misdadigers in ’n organisasie kry wat 193 000 lede het.”
Cele het gesê dit is “pynlik” om polisielede weens misdaad te arresteer, maar dit is die regte ding.
In die laaste sewe maande is 254 polisielede in Gauteng in hegtenis geneem weens hul beweerde betrokkenheid by onder meer korrupsie en rooftogte.
Onder dié polisielede is lt.genl. Richard Mdluli, nasionale hoof van die polisie se misdaadintelligensie-eenheid, wat homself Donderdag aan die polisie oorgegee het in verband met ’n moord
12 jaar gelede.
Twee van Mdluli se ondergeskiktes, kol. Nkosasana Ximba, ook bekend as “Killer”, en ao. Samuel Dlomo, het hulself ook weens dié moord aan die polisie oorgegee. ’n Vierde polisieman, lt.kol. Selelo Mthunzi, ook van misdaadintelligensie, is Vrydag gearresteer.
Al vier is nog in aanhouding.
Cele het gesê Mdluli se arrestasie verskil nie van enige ander arrestasie van ’n polisiebeampte nie. “Of jy ’n konstabel of ’n generaal is, daar is nie ’n verskil nie,” het Cele gesê.
“Ons sou daarvan gehou het dat dit nie ’n polisielid was wat gearresteer is nie.
“Dit was ’n pynlike ervaring, maar as ’n lasbrief uit is vir jou arrestasie, moet die polisie jou arresteer.
“Iemand het vir my gesê teen die tempo wat ons polisielede arresteer, gaan daar nie meer enige polisielede oor wees teen die einde van my termyn nie,” het Cele gesê.
“Dié persoon het gesê hulle stop my nie (om te arresteer nie), maar die tempo van arrestasies van polisielede is kommerwekkend.
“Die tempo waarteen ons polisielede arresteer, is die tempo waarteen hulle misdaad pleeg.
“Ek wil polisielede dit op die hart druk: Bly weg van misdaad. Julle moet dit beveg en nie deel daarvan wees nie.”
Genl. Bheki Cele: “Daar het elke dag ’n misdadiger saam met Jesus gesit.”
Foto: Theana Breugem