Cele: SA se misdaad is nie ergste ter wêreld
2010-03-10 06:31
Lizel Steenkamp
Kaapstad. – Suid-Afrika se misdaad is nie die ergste in die wêreld nie.
Komm. Bheki Cele, nasionale polisiehoof, het Dinsdag in die parlement gesê daar is geen statistiese bewyse vir die “wilde aanname” dat meer misdaad hier as elders ter wêreld aangemeld word nie.
“Waar kom dié vergelyking vandaan? Waarop grond mense dit as daar geen Interpol-statistieke is om dit te staaf nie? Dit is verkeerd!” het Cele aan die portefeuljekomitee oor polisie gesê.
Volgens hom verswyg talle ontwikkelende lande soos dié in Suid- en Sentraal-Amerika hul statistieke en dit skep ’n verwronge beeld van misdaad in Suid-Afrika.
Komiteelede het verstom gesit en luister na Cele se verklaring dat hier “baie minder” kapings as in ander lande is. Hy het wel toegegee misdaad is wreedaardig en gewelddadig. “Jy word nie net gekaap nie, maar ook geskiet en verkrag.”
Hy het voorts aangevoer sekere misdade is veel erger in die VSA en Engeland “waar daar meer mense gesteek word as in enige ander land in die Europese Unie”.
Die polisiehoof het die komiteelede vroeg-vroeg daaraan herinner “ek word nou ’n generaal genoem” omdat die kabinet die polisie se nuwe rangstruktuur reeds goedgekeur het.
Niemand het hulle egter daaraan gesteur nie en hom steeds as “kommissaris” aangespreek.
Komiteelede was duidelik nie beïndruk nie met Cele ná hul vorige vergadering in Pretoria toe die polisiehoof in ’n sweetpak en draftekkies opgedaag het.
Daar was weinig reaksie op sy halfhartige grappies en hy is blitsig vasgevat omdat die teikens om ernstige geweldmisdaad jaarliks met tussen 7% tot 10% af te bring, verlaag is.
Daarop het Cele geantwoord dat die nuwe teiken om misdade soos moord, verkragting en rooftogte elke jaar met tussen 4% en 7% te verminder, “meer haalbaar” is.
Annelizé van Wyk, ANC-LP, het Cele ergerlik daarop gewys dat die verlaging van teikens nie veel gaan doen om landsburgers se persepsies oor misdaad te verander nie.
“Pleks daarvan om die teikens af te bring, hoekom probeer julle nie eerder harder nie?”
Tog het Cele volgehou wetstoepassers kry nie die eer wat hulle toekom nie. “Die tronke is 140% oorbevolk. Daai mense het nie soontoe gemarsjeer nie, die polisie het hulle gevang.”
Hy en 20 van sy topbestuurslede het die polisie se begroting vir die 2010-’11-boekjaar aan die komitee voorgelê.
Daarvolgens sal meer as R900 miljoen bestee word om WB 2010 te beveilig.
Voorts sal die polisie vanjaar die beveiliging van lughawens oorneem nadat hulle voorheen net ’n “ondersteunende rol” daar vervul het.
- Beeld