Caster-toetse afgeneem
2009-09-16 06:33
Pretoria - Caster Semenya was “bitter ontsteld” toe daar foto’s van haar geslagsdele geneem is tydens die toetse wat in Suid-Afrika op haar gedoen is.
Semenya was só ontsteld dat sy haar vriende vanuit die hospitaal ge-SMS en gebel het om hulle te vertel wat met haar gebeur het, het Wilfred Daniels, wat onlangs weens die Semenya-skandaal uit Atletiek Suid-Afrika (ASA) as spanbestuurder en afrigter bedank het, gisteraand in ’n radiodebat gesê.
“Die toetse het amper twee uur geduur en Semenya het later erg gefrustreerd en selfs kwaad geword oor die vernederende aard van die toetse. Haar voete was in stiebeuels toe die foto’s geneem is.
“Miskien het die tyd aangebreek dat Semenya (Suid-Afrika se vroue-wêreldkampioen in die 800 m) sélf vertel watter toetse daar op 7 Augustus in die Medforum-hospitaal in Pretoria op haar gedoen is.
“Dit is die enigste manier waarop die volle waarheid sal uitkom,” het Daniels in die debat met mnr. Leonard Chuene, voorsitter van ASA, op Radio Metro gesê.
Volgens Die Burger se bronne was daar net drie mense dié betrokke dag in die hospitaal teenwoordig toe die toetse gedoen is: Semenya, haar afrigter, Michael Semé, en dr. Harold Adams, wat steeds spoorloos is.
Die opdrag aan haar was dat sy na die hospitaal moes gaan sodat sy vir die misbruik van dwelms getoets kon word.
Die Burger het betroubaar bevestiging ontvang dat Adams die afgelope naweek met die Internasionale Vereniging van Atletiekfederasies (IAAF) kontak gemaak het en “wou praat”.
Chuene hou steeds vol dat hy niks van die toetse weet nie.
Hy het ’n beroep op Daniels gedoen om op te hou om net allerlei bewerings te maak en ’n slag alles wat hy weet oor die toetse bekend te maak.
Hy het gesê ASA kon nie geslagstoetse op Semenya doen nie omdat sy grondwet nie daarvoor voorsiening maak nie. ASA sou ook nie vir sulke toetse betaal het nie.
Daniels het hierop gesê die antwoorde moet van Semenya self verkry word.
“Ek dink nie dit gaan meer saak maak wat die IAAF op 20 November bekend maak nie. Ek dink Caster se loopbaan is verby.”
- Die Burger