Caster-klagte ‘rassisties’
2009-08-20 16:28
Johannesburg- Suid-Afrikaanse unies en politieke organisasies het die IAAF gekritiseer oor die herrie wat rondom Caster Semenya losgebars het.
“Hierdie aantygings stink van die rassisme. Dit skep ‘n wanindruk van hoe ‘n vrou veronderstel is om te lyk,” het die Jong Kommuniste-liga (YCL) in ‘n verklaring gesê.
“Wat van Venus en Serena Williams? Hulle het nooit deurgegaan wat Semenya nou moet deurmaak nie. Is dit omdat hulle van Amerika afkomstig is?”
Die Suid-Afrikaanse Sokkerspelersvereniging (Safpu) het ook hulle ongelukkigheid oor die voorval uitgespreek.
Wat sê kundiges?:
‘n Ondersoek om die geslag van die kampioen naelloper Caster Semenya te bepaal sal verskeie toetse vereis, beweer ‘n dokter.
“’n Ginekoloog, endokrinoloog, genetikus en sielkundige sal gebruik word om die toetse op Semenya te doen,” het Ross Tucker, van die Sportwetenskap Instituut, gesê.
Die 18-jarige Semenya het die 800m wêreldtitel Woensdagaand verower tydens die Wêreldkampioenskappe in Berlyn. Sy het dit in ‘n rekordtyd van 1:55.45 kafgedraf. Dit is die vinnigste tyd in die wêreld vanjaar.
Die IAAF het ‘n paar weke gelede daarop aangedring dat Semenya ‘n geslagstoets moet doen. Dit kom na kommentaar oor dié jong atleet se manlike-gelaatstrekke en haar kragtige hardloopstyl.
Maar volgens kenners is dié proses baie ingewikkeld omdat ‘n groot verskeidenheid kundiges se hulp ingeroep moet word.
Geskiedenis van geslagstoetse:
Volgens Tucker het geslagstoetse in die 60’s begin, maar was dit slegs beperk tot ‘n ondersoek deur ‘n dokter. Maar sedertdien is besluit dat hierdie metode nie voldoende is nie omdat geslag meer behels as slegs die geslagsorgane.
“Sommige persone het eksterne geslagsorgane van een geslag, maar ander eienskappe van die teenoorgestelde geslag,” het Tucker gesê.
Later in die 80’s is die ondersoeke vervang deur chromosoom-toetse. Oor die algemeen beskik vroue oor twee “X” chromosome (XX) en mans oor beide ‘n “X” en “Y” chromosoom (XY). In sommige gevalle kan vroue slegs oor ‘n enkele “X” chromosoom beskik.
Maar selfs hierdie toets het sy beperkings gehad omdat sommige vroue wel oor manlike chromosome beskik maar die fisiese eienskappe van ‘n vrou het.
“Nie die fisiese ondersoek of die chromosoom-toets het gewerk nie. Daarom is daar besluit om van ‘n verskeidenheid kundiges gebruik te maak om die geslag van ‘n persoon te bepaal,” het Tucker gesê.
Semenya se toets:
Daar is nog nie sekerheid oor wanneer die uitslag van Semenya se toets beskikbaar sal wees nie. Hierdie voorval herinner aan ‘n soortgelyke gebeurtenis waarby die naelloper van indië, Santhi Soundarajan, betrokke was.
Soundarajan moes ook ‘n geslagtoets ondergaan nadat sy ‘n silwer medalje by die Asië Spele gewen het. Daar is bevind dat sy nie oor die seksuele eienskappe van ‘n vrou beskik het nie en sy moes haar medalje teruggee.
“Só iets het ‘n geweldige impak op ‘n persoon se lewe. Daarom word die hulp van ‘n sielkundige ook ingeroep,” het Tucker gesê.
– Sapa