Caster in geldpenarie
2009-09-08 07:03
Wlhelm de Swardt
Johannesburg - Caster Semenya, die vroue-wêreldkampioen in die 800 m, het nie eens geld om vir haar ma in Limpopo te gaan kuier nie, want Atletiek Suid-Afrika (ASA) het nog nie sy gekontrakteerde atlete betaal nie.
Dit terwyl ’n verskyning van Semenya in The Oprah Winfrey Show deur die mat geval het sonder dat sy daarin geken is omdat die ASA geëis het dat Semenya daarvoor betaal word.
Dit is gister deur mnr. Wilfred Daniels, voormalige spanbestuurder van ASA, bevestig.
Volgens Daniels se inligting is ASA se gekontrakteerde atlete se salarisse nie vir Augustus betaal nie en is daar sprake dat hulle ook nie dié maand betaal gaan word nie.
Semenya was na verneem word meer as bereid om verniet saam met Oprah Winfrey en haar stigting te werk omdat sy besef het dat dit vir haar loopbaan as atleet vorentoe baie sou beteken.
Intussen word gegis oor waar Semenya se paspoort is.
Dit het glo ná die Wêreldbyeenkoms in Berlyn “weggeraak”. Sy sou dus nêrens heen kon reis nie, al sou sy na internasionale byeenkomste genooi word.
Daniels, wat pas uit ASA bedank het, skat dat Semenya $200 000 (sowat R1,4 miljoen) aan inkomste kan verloor as sy genooi sou word.
Mnr. Molatelo Malehopo, uitvoerende hoof van ASA, het al dié beweringe as “absolute nonsens” bestempel.
Volgens hom is dié bewerings gemaak in ’n dokument wat opgestel is deur mense wat hulle daarop toespits om ASA in ’n slegte lig te stel en munt te slaan uit Semenya.
Daniels het gister onthul dat Semenya die dag voordat sy na Berlyn moes vlieg om aan die Wêreldbyeenkoms deel te neem, vir toetse na ’n Pretoriase hospitaal moes gaan.
’n ASA-beampte het haar laat verstaan dit is maar net nóg toetse om vas te stel of sy verbode middels gebruik. In werklikheid is “geslagstoetse” inderdaad op haar gedoen
sonder dat sy of haar afrigter vooraf daarvan ingelig is.
Sy is ook nie toegelaat om regsadvies in te win nie.
“Die dag voordat sy aan die eindronde van die 800 m moes deelneem, is sy weer getoets,” het Daniels gesê.
Dié keer was sy darem volgens hom bewus daarvan.
“Ek kon doodeenvoudig net nie meer met al die leuens saamleef nie.
“Die enigste eerbare ding was om te bedank,” het Daniels gesê.
- Beeld