Rowers breek kluis met hamer, slyper oop

2013-01-28 08:15

Johannesburg – 'n Polisiereservis en twee veiligheidswagte is vroeg Maandagoggend geskiet en kritiek beseer in 'n gewapende roof by die Carnival City-casino aan die Oos-Rand, het die polisie gesê.

Kapt. Julia Claassen het gesê 'n groep gewapende verdagtes het die casino kort na middernag binnegegaan en reguit na die kluis beweeg.

Claasen kon nie die aantal mense in die bende bevestig nie, hoewel verskeie mediabronne vroeër berig het dat 25 gewapende mans aan die rooftog deelgeneem het.

Die mans het mense by die casino aangesê om op die vloer te lê en het 'n hamer en slyper gebruik om die kluis oop te forseer.

Die bende het ses mense tydens die roof aangerand.

'n Bestuurder het die polisie ontbied.

"Toe hulle probeer het om te ontsnap, het 'n skietery ontstaan tussen die verdagtes en die polisie waarin twee veiligheidswagte en 'n polisiereservis van die Brakpan-polisiestasie geskiet is."

Die drie is in 'n kritieke toestand in 'n nabygeleë hospitaal opgeneem.

Die polisie het teen 01:30 Maandagoggend nog niemand in verband met die voorval aangekeer nie. Hulle het egter op 'n wit bakkie in die gebied afgekom wat na bewering in die rooftog gebruik is.

– Was jy op die toneel? Laai jou foto's of storie, of stuur dit aan Nuus24.

– Volg Nuus24 op Twitter.