Calitz 'wou kinders beskerm'
2012-12-10 16:30
Johannesburg – Debbie Calitz, wat ses maande gelede uit die kloue van Somaliese seerowers vrygelaat is, wou verhoed dat sy in hegtenis geneem word om haar kinders te beskerm, berig The Star.
'n Familielid het 'n onderhoud aan Talk Radio 702 toegestaan nadat Calitz Vrydag in hegtenis geneem is.
Calitz en agt ander mense het Maandag op dwelm-verwante aanklagte in die Hatfield-streekhof verskyn. Sy en haar kinders, Kerri-Ann Cross en Jason Cross is deur Latham Dixon verteenwoordig.
Hulle staan tereg op aanklag van die besit van dwelms en is elk op borgtog van R1 000 vrygelaat.
Landdros Kenneth Chauke het die saak tot 30 Januarie vir verdere ondersoek uitgestel.
Die polisie is Vrydag ontbied na die woonstel in Garsfontein oor die geraas, het kapt. Pinky Tsinyane, polisiewoordvoerder gesê. Calitz en haar seun en dogter deel die woonstel.
Tsinyane het gesê die polisie het dagga, daggaplante en “magic mushrooms” in die woonstel gevind.
Calitz is 20 maande lank deur seerowers in Somalië aangehou en het na bewering probeer om haar status te gebruik om te verhoed dat sy in hegtenis geneem word.
'n Bron het aan die koerant gesê vriende is "geskok" oor haar inhegtenisneming.
Calitz het onlangs ‘n boek oor haar ervaring as gyselaar – Debbie Calitz: 20 Months in Hostage Hell – uitgereik.
– Lees meer hier
– Volg Nuus24 op Twitter
