Calitz bieg oor daggagebruik

2012-12-15 11:37

Johannesburg – Debbie Calitz, wat 'n Somaliese gyseldrama oorleef het, het volgens berigte erken dat sy dagga gebruik het.

"Ek glo dagga is medisinaal. Ek het al daarvan tee gemaak vir my asma," het sy aan die Saturday Star gesê.

Calitz en agt ander mense het Maandag in die Hatfield-distrikhof in Pretoria op dwelmverwante aanklagte verskyn.

Die saak is tot 30 Januarie uitgestel.

Calitz en haar voormalige kêrel, Bruno Pelizzari, is amper ses maande gelede in Somalië vrygelaat ná hulle bykans twee jaar lank gevange gehou is.

Sy het onlangs 'n boek oor haar tyd as gyselaar bekendgestel.

"Dis 'n natuurlike plant en ek glo nie dit moet onwettig wees nie," het Calitz in haar onderhoud met die koerant gesê.

"Pleks van e-tol op ons paaie, moet dagga gewettig en belas word," het sy gesê.

– Volg Nuus24 op Twitter.

- SAPA