Bywoningsyfers vir WB dalk nuwe rekord
2010-07-02 05:19
Johannesburg – Die Wêreldbeker-sokkertoernooi in Suid-Afrika kan dalk ‘n nuwe rekord opstel in bywoningsyfers met miljoene sokkergeesdriftiges wat gereed maak vir die laaste rondes van die toernooi.
“Met die kwarteindrondes, semi-finaal en die finale ronde wat nog moet plaasvind kan Suid-Afrika moontlik die rekordboeke herskryf,” het Danny Jordaan, uitvoerende hoof van Fifa se plaaslike reëlingskomitee, Donderdag gesê.
Daar is reeds 2.69 miljoen ondersteuners wat kaartjies gekoop het vir die eerste twee rondes van dié wêreldwye sokker-skouspel.
“Ek reken daar is ‘n goeie kans dat ons die drie miljoen-mylpaal sal kan haal wat laas in 1994 in Amerika gedoen is,” het hy gesê.
“Die tekens is daar. Die Suid-Afrikaanse ondersteuners is ongelooflik. Die gees in die land is een van die uitstaande elemente van hierdie Wêreldbeker-toernooi.”
Die bywoningsyfers by die jolkolle regoor die wêreld is lankal reeds meer as drie miljoen.
Volgens hom het buitelandse besoekers reeds sowat R6.5 miljard bygedra tot Suid-Afrika se ekonomie tydens die Wêreldbeker-sokkertoernooi. Na verwagting sal hierdie bedrag tot R9 miljard styg teen 11 Julie.
Die aantal toeriste in Suid-Afrika is meer as wat oorspronklik verwag is.
Volg Nuus24 op Twitter.
- Nuus24