Bye takel paramedici by ongeluk
2011-09-14 08:15
Bloemfontein - Paramedici by ’n ongeluk waar ’n vragmotor vol bye teen ’n ander vragmotor gebots het, het lelik onder die bye deurgeloop terwyl hulle die beseerdes moes behandel.
Drie paramedici van Netcare 911 is talle kere deur die bye gesteek by dié botsing op die N3 by Warden, het Jeffrey Wicks, woordvoerder van Netcare 911, gesê.
’n Vragmotor, met ’n vrag byekorwe, het Maandag kort voor middernag buite Warden van agter teen ’n ander vragmotor vasgery en omgeslaan.
Die honderde byeneste het van die vragmotor geval.
Twee insittendes in die bye-vragmotor is dood en drie ernstig beseer. Twee mans in die ander vragmotor is ook beseer.
Wicks sê die drie paramedici het nie ’n maklike taak gehad tussen die bye nie. Hulle het egter hul man gestaan en die beseerdes so tussen die bysteke deur behandel. “Hulle is talle kere gesteek.”
Slegs die paramedici wat rondbeweeg het, is gesteek en nie die beseerdes nie.
Gelukkig was nie een van die paramedici allergies vir bye nie, het Wicks gesê.
Die polisie het mense Dinsdag gewaarsku om hul voertuigruite hier toe te hou, omdat van die bye steeds in die omgewing was. Die byeboer was Dinsdag steeds besig om sy bye bymekaar te maak.
Die beseerdes is na die Mediclinic Bethlehem en die Thebe-hospitaal op Harrismith gebring.
Volg Nuus24 op Twitter.
- Volksblad