Buthelezi kap politici, Malema oor dwase woorde
2010-04-07 11:10
Rajaa Azzakani, Die Burger
Kaapstad -“Dit is nou die tyd vir ons land se leiers om wysheid en diskresie te toon deur ’n einde te maak aan dwase woorde soos ‘Skiet die Boere’.”
Die sing van liedjies soos “Skiet die Boere” is ’n beroep om groter vernietiging, verdeeldheid en pyn, het Mangosuthu Buthelezi, IVP-leier, gister gemaan.
Hy het in sy weeklikse nuusbrief gesê pres. Jacob Zuma, as ’n ouer en meer volleerde leier wanneer dit kom by die ontlonting van spanning, was goed bewus van die ramp wat kon volg ná die moord Saterdag op Eugène Terre’Blanche, AWB-leier.
Zuma het op televisie by politieke leiers gepleit om hulle te weerhou van aanhitsing en hulle eerder te beywer vir nasionale eenheid, vrede, verdraagsaamheid en respek vir ander.
Buthelezi het gesê: “Ek kan nie anders as om myself af te vra waarom ons president so lank gewag het om dié beroep te doen nie.”
Leiers van alle politieke partye het gewaarsku oor die moontlike gevolge van Julius Malema, ANC-jeugleier, se haatspraak.
“Glo die ANC steeds hy is reg om die hofbevel (wat Malema verbied om die lied te sing) te verwerp?” wou Buthelezi weet.
Hy meen die ANC is gewaarsku dat ’n verontagsaming van die hofbevel daarop neerkom dat die party teenoor die regstelsel geplaas word, wat die gevaar inhou dat die samelewing in twee kampe gedestabiliseer word.
“Die oomblik wat mense die gereg sien rondspartel, verloor dit gesag en word daar maklik oortree.”
Buthelezi het gesê plaasmoorde kan nie net toegeskryf word aan loongeskille en arbeidskwessie nie. “Daar is iets boosaardig aan die werk. Dié goed kan nie gebeur in die afwesigheid van ’n kultuur van wetteloosheid nie.”
Hy het gesê ongeag of die bevrydingslied verantwoordelik was, bly dit onwys om die verlede by die hede in te sleep.
“Ons het as ’n nasie soveel energie gebruik om versoening na te streef en dit sal ’n tragedie wees om toe te laat dat individue die vordering vernietig wat deur so baie gemaak is.”
Hy het gesê die AWB se standpunt om sy oorlogsverklaring terug te trek, toon ’n wysheid wat hy in die Afrikaner-gemeenskap waardeer.
-Die Burger