Busramp skok land
2011-08-25 07:00
Rheenendal – Die Rheenendal-gemeenskap tussen Knysna en Sedgefield steier van skok ná moontlik die grootste busramp nóg in die Suid-Kaap.
Altesame 14 laerskoolkinders en hul busbestuurder het Woensdag kort voor 08:00 verdrink nadat hul skoolbus in die stormwater van Kasat se Drif beland het. Die ongeluk het op die Rheenendalpad sowat 20 km wes van Knysna gebeur.
Een van die kinders is net ’n paar sekondes voor die ramp teen ’n bult op dié pad opgelaai.
Die bus behoort aan African Express en dit word uitgekontrakteer aan die Wes-Kaapse departement van onderwys. Die leerlinge is almal van die Primêre Skool Rheenendal.
Die bus het sitplek vir 33 mense en daar was minstens 57 passasiers in die bus. Die bestuurder was Colin Pale.
’n Ma het al drie haar kinders van onderskeidelik 7, 9 en 15 in die treurspel verloor.
Twee tweelinge was ook onder die slagoffers.
Die bus het stilgehou om ’n kind op te laai, toe die remme glo ingegee en dit stadig agteruit begin loop het. Dit het enkele sekondes en sowat 30 meter verder oor die rand van die brug in die bruin water van die rivier geval. Net die agterkant van die blou bus het uitgesteek.
Johan Luiters wat daar naby werk, het gesê hy het kort ná 08:00 opgedaag. Hy het gesien hoe van die kinders deur die bus se vensters probeer klim. Net 42 van die leerlinge kon die oewer bereik.
Reddingswerkers en noodvoertuie van Knysna en George het hulle na die toneel gehaas.
Duikers het die toneel gefynkam. Lyke is een ná die ander uit die water gebring en onder wit komberse langs mekaar op die brug geplaas. Die eerste lyke is kort ná 08:00 uitgehaal.
Ene Brett, wat nie sy van wou noem nie, het vertel dat hy dadelik in die water gespring het toe hy op die toneel aankom. Hy werk daar naby en gebruik elke dag die pad.
Hy het een van die kinders uit die water probeer trek, maar die kind was ongelukkig reeds dood.
Hy het vertel daar was al vantevore ongelukke by dieselfde bruggie.
“Dit is nie die eerste keer dat hier ’n ongeluk was nie, en ook nie die laaste keer nie.”
Namate nuus oor die ongeluk bekend geword het, het ’n groot klomp ouers en belangstellendes saamgedrom op die toneel wat deur die polisie afgesper is.
Bekommerde ouers het probeer vasstel of hul kinders onder die slagoffers is.
Die hulp van ’n ekstra swaar-insleepvoertuig is later ontbied. ’n Groot hyskraan op die rooi insleepvoertuig het kort voor 12:00 daarin geslaag om die blou bus uit die water te trek.
Die bus is kort daarna weggesleep en word by ’n onbekende bestemming deur die polisie bewaak.
’n Hoëvlak-ondersoek sal binnekort begin.
Volg Nuus24 op Twitter.
- Volksblad