Busongeluk: Skoolhoof ook dood
2012-07-21 19:27
Johannesburg – Die hoof van
Cradock-laerskool was een van die 18 mense wat Saterdag dood is toe ’n bus
vol skoolkinders teen ’n minibus gebots het op die R61 tussen Cradock en
Graaff-Reinet in die Oos-Kaap.
Hy was ook die bestuurder van die bus,
het ’n Arrive Alive-woordvoerder, Tshepo Machaea, Saterdag gesê.
Daar is aanvanklik berig dat 16
mense in die ongeluk dood is, maar twee ander het in die hospitaal gesterf, het
Machaea vroeër gesê.
Ashraf Ismail, woordvoerder van die Padverkeersbestuurskorporasie, het aan AFP gesê 13
van die oorledenes was in die minibus en twee van die ander sterftes is
kinders.
Veertien mense is ernstig beseer. Hulle is almal na nabygeleë hospitale geneem.
Die skoolbus het kinders blykbaar na 'n sportbyeenkoms vervoer terwyl die
minibus met passasiers vanaf Kaapstad na Mthatha onderweg was toe die ongeluk
plaasgevind het.
– Volg Nuus24 op Twitter
- SAPA
