Burgemeester kies hasepad
2011-05-14 08:00
Volksblad
Kroonstad – Die beleërde burgemeester in die omstrede Viljoenskroonse toiletskandaal het Vrydag met ’n bewende onderlip weggehardloop van nagenoeg 1000 woedende inwoners met diensleweringsgriewe.
Sy is beledig, verskree en uitgejou toe sy vervaard probeer wegkom het van optoggangers in swart klere, soos roubeklaers, met twee doodskiste as simbool van die Moqhaka-raad se “begrafnis”.
Mantebu Mokgosi, politieke hoof van die Moqhaka-munisipaliteit (Kroonstad, Viljoenskroon en Steynsrus), het skynbaar nie kans gesien om ná ’n week van toiletdrama en vlymskerp kritiek nog aan Kroonstadters te moet verduidelik waarom die dorp uitmekaar val nie.
Sy het letterlik haar rug op die inwoners gedraai en vergesel van ANC-raadslede, haar na die munisipale gebou gehaas waar sy agter die glasdeure verdwyn het.
Mokgosi het wel voordat sy gevlug het, aan die media gesê dit is juis die inwoners se skuld hoekom Kroonstad lyk soos hy lyk.
“Die mense betaal nie hul dienstegelde nie.
“Boonop is meer as 50% van die inwoners werkloos.”
Woede en ontevredenheid oor Kroonstad se slaggate en riool- en waterprobleme het ’n hoogtepunt bereik in die dorp se bestaan van meer as 100 jaar.
Altesaam 3500 mense het reeds ’n versoekskrif teen swak dienslewering geteken, en die grootste hofoptrede sover bekend in Kroonstad se geskiedenis word beplan met die doel om die hooggeregshof te vra om die munisipaliteit tot dienslewering te dwing.
Gister het inwoners in swart klere ’n vreedsame optog teen die diensleweringsgebreke gehou.
’n Brief met griewe is aan die munisipaliteit oorhandig.
Die optoggangers of “roubeklaers”, wat bestaan het uit sakelui, inwoners van alle rasse, jonk en oud, ryk en arm, het gister met swaaiende plakkate deur die middedorp beweeg.
Twee kiste met die woorde “rus in vrede” is gedra en later by die munisipaliteit neergesit.
Die griefskrif was aan Mcedisi Mqwathi, munisipale bestuurder, gerig, maar Mokgosi is gestuur om dit in ontvangs te neem.
Sy het die media toegespreek, maar toe inwoners wou gehad het sy moet met hulle praat, het sy weggehardloop.
Die optog was baie vreedsaam, maar Mokgosi se weghardlopery het inwoners kwaad gemaak.
Die skare het haar skerp veroordeel omdat sy haar rug op hulle gedraai het, net soos die ANC self en die Jong-Kommuniste-liga (JKL) haar dae gelede gekritiseer het oor die toiletdebakel.
Me. Mary-Ann van Aswegen, woordvoerder van die optog, sê Mokgosi se gedrag gister is ’n jammerte.
“Ons het vir die munisipale bestuurder gevra, maar te midde van die omstredenheid om die Rammulotsi-debakel (die toilette) het hy haar gestuur.
“Dit voel eintlik sy is op pad uit. Dit sou meer beteken het as Mqwathi die brief kom ontvang het. Dit sou beteken het hy gee om.”
Ook die DA het Mokgosi se optrede gekritiseer.
atricia Kopane, DA-LP wat aan die optog deelgeneem het, sê: “Sy hardloop weg. As sy respek gehad het, sou sy ’n woord gesê het,” het Kopane gesê.
Van die treffendste plakkate gister het gelui I’m not drunk, I’m dodging potholes, Eish Ace, come and see this mess, Kroonstad is stukkend en Kroonstad ,1855–Q2011.
Volgens Van Aswegen het 2000 mense deelgeneem.
Volg Nuus24 op Twitter
- Volksblad