Builders Warehouse: Twee vas ná doodskoot
2012-02-22 12:24
Johannesburg – Twee van die vier verdagtes wat na bewering ‘n klant buite ‘n Builders Warehouse doodgeskiet het, is in hegtenis geneem, het die Johannesburgse polisie gesê.
Kapt. Kym Cloete sê een van die mans is in die Paulshof-gebied naby die moordtoneel aangekeer, terwyl die ander verdagte in Berea, naby Hillbrow, vasgetrek is.
Die twee ander mans is steeds soek.
Die klant is Woensdagoggend net ná 06:00 by die winkel in Sandton, Johannesburg, doodgeskiet.
Massmart – wat Builders Warehouse besit – vermoed dat die rowers ‘n wegkommotor wou kaap nadat hulle daarin misluk het om die winkel te beroof.
“’n Struweling het ontstaan en... ons moet met diepste en uiterste spyt bevestig dat die eienaar van die voertuig geskiet en noodlottig gewond is,” lui die verklaring.
Cloete sê werknemers en veiligheidswagte was besig om die winkel oop te sluit toe ‘n man hulle genader het. Die man het ‘n sekuriteitsuniform aangehad.
Die man het hulle met ‘n vuurwapen aangehou nadat hulle hom ingelaat het. Drie ander mans het by hom aangesluit.
Cloete sê die verdagtes wou kontant hê, maar “die werknemer is aangerand toe hy nie die kluis kon oopsluit nie.”
Op daardie oomblik het twee manlike klante by die winkel opgedaag en een van hulle is geskiet, het sy gesê.
Volg Nuus24 op Twitter
- SAPA