Buchan verwag 400 000 by saamtrek
2010-01-16 07:18
Neels Jackson
Johannesburg – Angus Buchan, evangelis van Greytown, verwag meer as 400 000 mans by vanjaar se Mighty Men-konferensie.
Dit is meer as die oorsese besoekers wat by die Wêreldbeker-sokkertoernooi verwag word. Die toerismekonsultante Grant Thornton wat werk met ramings van verwagte besoekertalle tydens die toernooi, verwag sowat 332 000 besoekers van buite Afrika.
Buchan het egter gesê die 400 000 mense vir wie hulle gereed maak, verteenwoordig die kleinste groei wat hulle tot nog toe vir ’n Mighty Men-konferensie gehad het.
Met die eerste Mighty Men in 2004 was daar 240 mans. Daarna was daar 600 in 2005, 1 060 in 2006, 7 400 in 2007, 60 000 in 2008 en 150 000 in 2009.
Die tema van vanjaar se konferensie is “Watchmen of the House”. Buchan het gesê dit gaan daaroor dat mans verantwoordelikheid moet aanvaar vir hul huis, maar ook by die werk en in ander kringe, tot in die parlement.
Die feit dat Suid-Afrika in ’n gemors is, is Christene se skuld, sê hy. Dis Christene wat morele leiding moet neem.
Hy wil vir die mans sê dat hulle moet waak teen die morele verval wat die samelewing ondermyn.
Besprekings vir vanjaar se Mighty Men-konferensie, wat van 16 tot 18 April gehou word, kan nou reeds gedoen word op die webwerf www.mmc2010.com.
- Die Burger