Broers kry dubbele ooievaarsbesoek
2011-03-04 09:03
Bloemfontein - Twee Bloemfonteinse broers se beker van vreugde loop oor nadat hul vrouens binne ’n uur van mekaar geboorte aan elk van die egpare se eerste seun geskenk het.
Die familie Jansen van Vuuren van die stad was Donderdag baie trots op die dubbele ooievaarsbesoek in hul geledere.
Hendri Jansen van Vuuren (31) en sy broer, Thys (33), het albei Woensdag die trotse pa van ’n babaseuntjie geword.
Hendri se vrou, Dalene, het om 10:42 geboorte aan klein Matthys geskenk. Sy het ook Woensdag verjaar.
Thys se vrou, Trudie, het minder as ’n uur later, om 11:24, geboorte aan Thysie geskenk. Dit is albei die broers se tweede kind.
Hendri en Dalene het ’n dogtertjie, Lea (18 maande), en Thys en Trudie het ook ’n dogtertjie, Mika (3).
“Ons het dit glad nie so beplan dat ons vroue op dieselfde dag geboorte skenk nie,” het Hendri Donderdag uit die Bloemfontein-Medi-Clinic vertel.
Hy sê dinge het baie toevallig so gebeur.
“Ons datum was uit die staanspoor vir dié week bepaal, maar Thys-hulle se kleinding het toe besluit om ’n week vroeg te kom,” sê hy.
Hy sal nooit die dag, sowat nege maande gelede, vergeet toe Thys hom met die groot nuus gebel het nie.
“Hy het vir my gesê ek sal dit nie glo nie, maar hy en Trudie verwag ’n babatjie. Toe sê ek vir hom hy sal dit ook nie glo nie, maar ons verwag ook ’n babatjie.”
Vir die broers is die dubbelgeboorte ’n baie besonderse gebeurtenis.
“Ek dink vir die twee nefies sal dit ook ’n spesiale band wees,” sê Thys.
Die twee egpare het tot dieselfde ginekoloog, dr. Lizette de Coning, gehad.
“Sy was saam met ons verheug oor ons twee seuntjies se spesiale geboortedag,” sê Hendri.
Ook die grootouers en ander familie is verheug oor die dubbelgeboorte en die verjaardae sal elke jaar behoorlik gevier word.
- Volksblad