Broer sê 'Sondagverkragter' om hom oor te gee
2011-10-14 07:15
Ügen Vos en Amanda Roestoff
Johannesburg – Die vermeende “Sondagverkragter”, wat glo minstens tien meisies verkrag en twee vermoor het, het hom aan die polisie oorgegee omdat sy broer hom gevra het om dit te doen.
Die 35-jarige verdagte, die pa van ’n sesjarige kind, het hom in Margate aan die KwaZulu-Natalse suidkus oorgegee ná die moord op Louise de Waal (17), wat naby die Hoërskool Die Burger in Roodepoort ontvoer is.
Sy broer het hom op versoek van die polisie oortuig om dit te doen.
Dit het ook aan die lig gekom dat hy in 2007 die tronk vrygespring het nadat hy skuldig bevind is dat hy drie minderjarige meisies by ’n bushalte in Roodepoort gemolesteer het.
Die man het glo sowat drie jaar lank op meisies tussen tien en 17 jaar aan die Wes-Rand en in Noordwes toegeslaan.
Hy is ’n getroude man met ’n sesjarige seuntjie. Hy het aan die polisie erken dat hy Louise eergister naby haar skool ontvoer en vermoor het.
Louise se verbrande lyk is Woensdagmiddag omstreeks 13:00 op ’n plaas naby Maropeng naby Krugersdorp gevind.
Haar skoolsak en die man se vuurwapen is in die verdagte se werkbakkie in Roodepoort aan die Wes-Rand gevind.
Kapt. Gerald Mfeka, polisiewoordvoerder van Margate, het aan Beeld se susterkoerant The Witness gesê dat die verdagte oornag na Margate in die KwaZulu-Natalse suidkus gereis het in sy luukse goue Mercedes-Benz-sportnutsvoertuig.
Die lang, maer man met ’n kaalgeskeerde kop het ’n roomkleurige slenterbroek en ’n gestreepte T-hemp gedra toe hy hom oorgegee het.
Hy was netjies versorg, berig Indhrannie Pillay en Chris Ndaliso.
Familielede het Louise uitgeken aan haar naeltjiering, maar die polisie gaan steeds forensiese en DNS-toetse doen om haar identiteit amptelik te bevestig.
Blykbaar is die naeltjiering, Louise se oorbelle en ’n deel van haar skoolwapen wat op haar uniform geborduur was, van die enigste leidrade tot die bevestiging van haar identiteit.
Hy sal na verwagting vroeg volgende week in die Krugersdorpse streekhof verskyn. Hy word glo vandag teruggebring na Gauteng.
Hy word voorlopig slegs van Louise se moord aangekla, maar die polisie het gesê daar kan later nog aanklagte bygevoeg word.
Die polisie het hom intussen verbind met minstens tien ontvoerings – insluitend die een waarin Lazanne Farmer (14) van Pretoria-Wes vermoor is.
Lazanne het in September verlede jaar haar nek gebreek toe sy vermoedelik uit die ontvoerder se bakkie gespring het.
Die ontvoerder het daarna haar 16-jarige vriendin na ’n beboste gebied langs die Hennopsrivier geneem en ’n drankie gegee om te drink, haar kaal uitgetrek en toe verkrag.
In die 2007-saak van seksuele aanranding is hy drie jaar tronkstraf opgelê, wat opgeskort is, en hy moes gemeenskapsdiens verrig.
Die verdagte het in daardie stadium gewerk as ’n verspreidingsbeplanner vir ’n vervoermaatskappy in Kempton Park, maar hy is deesdae betrokke by die insit van plafonne en skortings aan die Wes-Rand.
Genl.maj. Nobesuthu Masiya, waarnemende polisiehoof in Gauteng, het Donderdag gesê die man het homself Donderdagoggend 05:00 oorgegee, kort nadat ao. Peet du Toit, ondersoekbeampte, sy broer gekontak het.
Masiya het gewaarsku dat die polisie nog nie met sekerheid kan sê dat die verdagte wel die Sondagverkragter is nie aangesien die ondersoek steeds aan die gang is.
Die Sondagverkragter het onder meer in Rustenburg, Vanderbijlpark, Potchefstroom, Pretoria-Wes, Carletonville, Krugersdorp-Wes, Roodepoort en Hekpoort toegeslaan.
– Volg Nuus24 op Twitter
- Beeld