Britte dink ons is barbaars – Zuma
2010-03-03 08:13
Londen - Pres. Jacob Zuma sê hy is nie verbaas oor die Britse media se fel kritiek oor sy poligamiese leefstyl nie, omdat Britte nog altyd geglo het Afrikane is "barbaars" en "minderwaardig".
Zuma het gesê diegene wat nie sy kultuur verstaan nie, moet dit met hom bespreek, nie bloot met beledigings toesnou nie, berig die Cape Times.
"Toe die Britte in ons land aangekom het, het hulle gesê alles wat ons doen is barbaars, verkeerd en minderwaardig op elke manier. Ek is 'n vryheidsvegter en ek het geveg om myself sowel as my kultuur te bevry, en om gerespekteer te word. Ek is baie duidelik oor dié kwesses. Ek het nog nooit neergekyk op enige kultuur nie. Niemand het die reg om ander te oordeel nie."
Stephen Robinson, 'n Daily Mail-joernalis, het na Zuma verwys as 'n“seksmal fanatikus” wie se besoek aan die Verenigde Koninkryk glo "verskeie uitdagings vir amptenare bied".
Zuma het Dinsdag in Londen aangekom vir sy eerste amptelike staatsbesoek aan die land.
– Nuus24