Brits-tiener moontlik verlam ná skietery

2013-01-03 12:42

Johannesburg – ‘n Tienerseun wat op Oujaarsaand in Elandsrand naby Brits na bewering vir 'n selfoon geskiet is, is in die stadium verlam van die bors af ondertoe.

Maroela Media berig Luday van der Merwe (15) en twee vriende, Deidre en Marcel Strydom, het op Oujaarsaand probeer vasstel of alles in orde is by 'n nabygeleë huis wat hulle opgepas het.

Hulle was omstreeks 23:50 op pad terug huis toe, toe drie mans hulle in die straat genader het en hul selfone geëis het. Een van die verdagtes het ‘n vuurwapen gehad.

Die verdagte het ‘n skoot in die lug in geskiet en daarna die vuurwapen op Deidre gerig.

Van der Merwe het agter haar gestaan en haar uit die pad gestamp, waarna hy in die bolyf geskiet is.

Beeld het vroeër berig die tiener sal Vrydag sy 16de verjaardag in die Dr. George Mukhari-hospitaal in Ga-Rankuwa deurbring.

Volg Nuus24 op Twitter