Brits-slagter vermoor, seun gewond

2012-12-14 12:40

Johannesburg – Die eienaar van ‘n slaghuis is in ‘n rooftog doodgeskiet en twee mense is in die voorval by die winkel in Brits gewond, het die polisie in die Noordwes gesê.

Lt.kol. Lesego Metsi sê drie gewapende rowers het Donderdag om 20:00 die slaghuis binnegestorm en geld geëis terwyl Gerald Rudolf (65), sy 31-jarige seun ‘n vroulike werknemer die winkel wou sluit.

“Die verdagtes het die eienaar na bewering doodgeskiet en sy seun is in albei bene geskiet, terwyl die vroulike werknemer in die skouer geskiet is,” het die polisiewoordvoerder gesê.

Rudolf is op die toneel dood verklaar. Sy seun en die werknemer is in Brits Hospitaal opgeneem.

Metsi sê die rowers het ‘n aktetas vol geld, ‘n pistool, bankkaarte en tjekboeke gesteel, en met die slaghuiseienaar se Toyota Corolla op die vlug geslaan.

Die verlate voertuig is sowat 2 km verder opgespoor.

Volg Nuus24 op Twitter

- SAPA