Bredasdorp-tiener vandag ter ruste gelê

2013-02-09 10:15

Kaapstad – Anene Booysen, die 17-jarige meisie wat wreed aangerand, verkrag en vermink is, word Saterdag ter ruste gelê, het die eNCA-nuuskanaal berig.

Sy is Saterdag met ernstige beserings na 'n plaaslike hospitaal geneem nadat sekuriteitswagte by 'n bouterrein op haar verminkte liggaam afgekom het. Sy is later na die Tygerberg-hospitaal oorgeplaas, waar sy Saterdagaand gesterf het.

Anene het kort voor sy gesterf het, die naam van een van haar beweerde aanvallers genoem. Dié man, Jonathan Davids, haar ekskêrel, is Saterdag in hegtenis geneem. Hy het vroeër vandeesweek in die hof verskyn en die saak teen hom is tot Dinsdag uitgestel.

Twee ander mans is intussen in hegtenis geneem in verband met die voorval wat wyd veroordeel is.

– Volg Nuus24 op Twitter