Bredasdorp-man steek gesig weg in hof
2013-02-11 12:18
Kaapstad – Een van Anene Booysen se vermeende moordenaars het te midde van 'n gefluister in die openbare galery in die Bredasdorp-landdroshof verskyn.
Johannes Kana (21), wat Maandag vir die eerste keer in die hof verskyn het, het sy gesig met 'n handdoek bedek toe hy in die klein hofsaal gelei is.
Kameramanne en fotograwe het gespook om 'n foto van die maer man met tatoeëermerke op albei sy arms te kry.
Inwoners het woedend in die openbare galery gefluister.
Landdros Graham Cupido het aan Kana gesê hy word daarvan aangekla dat hy die 17-jarige Anene Booysen in Kleinbegin verkrag en vermoor het.
Die landdros het gevra of hy om regshulp gaan aansoek doen of sy eie prokureur gaan aanstel.
Kana het sag geantwoord en gesê hy sal die staat se prokureur gebruik.
Sy ma het in die hof opgespring en geskree: "Eie prokureur!"
Toe Kana gevra is of hy om borgtog gaan aansoek doen, het sy ma wéér opgespring en geskree: "Sê ja, man."
Kana sal Dinsdag saam met sy beweerde medepligtige Jonathan Davids (22) in die hof verskyn.
Die hof het vroeër beslis dat die media weens openbare belang die saak mag dek. Die media is egter verbied om Kana se gesig in koerante of op TV te wys.
Maria Marshall, staatsaanklaer, het aan die hof gesê sy wil nie hê die beskuldigde se gesig moet op TV of koerante verskyn nie. Sy gee nie om of die man se lyf gewys word nie.
Landdros Graham Cupido het gevra of daar 'n spesifieke rede is vir die versoek.
Marshall het gesê die ondersoek kan in gedrang kom omdat die staat nog verklarings afneem.
Die 17-jarige Anene is verlede week by 'n bouterrein aangetref nadat sy aangerand, verkrag en vermink is. Sy het verlede Saterdag in die hospitaal gesterf en is die afgelope naweek begrawe.
Dié misdaad het woede uit alle sektore van die samelewing ontlok.
– Volg Nuus24 op Twitter
- SAPA
