Branson se reaksie op rasvoorval 'stel teleur'
2012-02-09 09:01
Johannesburg – Die man wat Richard Branson in ’n e-pos van ’n vermeende rassistiese voorval by die Virgin Active-gimnasium in Morningside, Sandton, in kennis gestel het, is ontevrede met Branson se antwoord.
Victor Dlamini, ’n gimnasiumlid, is ook nie oortuig dat Branson self die boodskap geskryf het wat eergistermiddag onder die Virgin-groephoof se naam op Virgin Active SA se Facebook-blad verskyn het nie.
Die brief het gevolg ná ’n voorval waarin Liz Hleza (51) glo tydens ’n spinklas op Oujaarsdag deur ’n ander gimnasiumlid uitgejou en herhaaldelik ’n “k****r” genoem is.
Dlamini het Maandag van die voorval in The Star gelees en “in ’n toestand van skok” onmiddellik ’n brief aan Branson geskryf.
In die brief vra hy Branson om betrokke te raak omdat Virgin Active SA die situasie “swak hanteer het”.
Branson het aanlyn geantwoord dat die Virgin-groep geen vorm van diskriminasie duld nie, veral nie rassisme nie. Hy het ook gesê die betrokke partye het vergader, Hleza is om verskoning gevra en die situasie word ondersoek.
Dlamini het gesê hy het ’n beter antwoord van ’n “leier” soos Branson verwag.
Hy meen die lid moes onmiddellik uit die Virgin-groep geskors gewees het en dit is nie ’n oplossing as hy net met Hleza hande skud nie. “Virgin Active moet nie ’n veilige hawe vir rassiste word nie.”
Dlamini het mense op Twitter gevra om ander gevalle van rassisme by Virgin Active aan te meld. Hy het ses gekry, het hy gesê.
Lesley Mofokeng, ’n joernalis van City Press, het aanlyn oor sy eie ervaring by ’n Virgin Active-klub geskryf.
Mofokeng vergader Donderdag met die bestuur by die klub in Sunninghill nadat ’n middeljarige wit man hom glo verlede maand “nutteloos” en ’n “f****r” genoem het.
Die klubbestuur het Woensdag met dié lid vergader.
Mofokeng het vertel hy is nog te “getraumatiseer en ongelukkig” om weer by die gimnasium te gaan oefen.
Hy meen ook die klub het hom “verraai” deur nie die naam van die lid wat hom beledig het aan die polisie te gee nadat hy ’n klag van crimen injuria ingedien het nie.
Chantel Rall, skakelbestuurder van Virgin Active SA, het Woensdagmiddag laat gesê hulle het nog geen dagvaarding van die polisie ontvang om inligting oor dié lid te verskaf nie.
Rall het ook beklemtoon dat Virgin Active hul lede se privaatheid respekteer en net persoonlike inligting sal uitgee as hulle deur ’n hof of wetgewing aangesê word om dit te doen.
– Volg Nuus24 op Twitter
- Beeld
