Brandweer kry skuld vir skade aan Brits-winkel
2012-08-09 12:38
Johannesburg – Foutiewe brandweer-toerusting word blameer vir die aansienlike skade wat by 'n Pick n Pay in Brits aangerig is toe 'n brand by die winkel uitgebreek het, het Beeld Donderdag berig.
"Hul pype het gelek én gebars en hulle het net twee brandwaens gehad," het die winkel se eienaar, Peter Powell, gesê.
Sowat R35 miljoen se skade is aangerig. Die bestuurder van die bakery het Powell Woensdagoggend net na 06:00 gebel om te sê dat die winkel brand.
Die brandweer het vinnig opgedaag, maar die brand is eers na 12:30 geblus. Niemand is in die voorval beseer nie.
Die dak van die winkel het ingegee en alles in die winkel is verwoes.
Volgens Beeld was een van die Madibeng-munisipaliteit se brandwaens, die enigste een wat vure van bo kan beveg, buite werking omdat daar nie geld was om dit reg te maak nie.
'n Woordvoerder vir die munisipaliteit, Lebogang Tsogang, het ontken dat die toerusting foutief was.
Elsa Lourens van die Vryheidsfront plus, en lid van die stadsraad, het gesê die skade kon verhoed word as die brandweer se toerusting in 'n werkende toestand was.
Volg Nuus24 op Twitter.
- SAPA
