Brandstof steeds genoeg vir die Vrystaat
2011-07-15 09:01
Bloemfontein - Terwyl petrolpompe landwyd vinnig leeg raak, het die Vrystaat nog oorgenoeg brandstof.
Talle vulstasies op plekke elders in die land het nie meer ’n druppel brandstof nie weens die staking van die vakbond Chemical, Energy, Paper, Printing, Wood and Allied Workers’ Union (Ceppwawu).
Die vakbonde Ceppwawu, Giwusa en Sacwu eis ’n verhoging van tussen 11% en 13%, terwyl werkgewers tussen 4% en 7% aanbied.
Daar is tans glo geen onderhandelings tussen die twee partye nie.
Ben Deysel, eienaar van die Harrismith Truckstop en voorsitter van die AHI se provinsiale raad, sê nog niks probleme is aangemeld nie.
“Die probleme word meer ondervind in groot stede waar die vlak van intimidasie van stakende vakbondlede baie hoër is as hier.
“Nog ’n belangrike rede waarom ons brandstof het, is omdat baie van die Vrystaatse depots private kontrakteurs gebruik.”
Deysel sê die provinsie sal eers begin om probleme te ondervind wanneer die voorraad by die depots min raak.
“Maar selfs dan kan mense gerus wees omdat die meeste van die depots hier ook van private vervoerkontrakteurs gebruik maak.”
Werknemers of eienaars by vulstasies in Bloemfontein, Springfontein, Ladybrand, Welkom en Bethlehem met wie Volksblad gepraat het, het almal bevestig daar is nog brandstof.
Intussen het Peter Noke, nasionale direkteur van die Suid-Afrikaanse Petroleum-kleinhandelaarsvereniging, ’n beroep op stakende werkers gedoen om die nywerheidsaksie op te los en aan die belang van die land te begin dink.
“Vakbonde sukkel om hul lede te beheer.
“Werknemers wil dinge moeilik maak omdat hulle werkgewers wil dwing om aan hul vereistes te voldoen. Hier is ’n kultuur van wanorde in ons land die oomblik wanneer ’n staking begin.”
Sowat 70 000 werkers in die petroleumsektor het verlede week begin staak.
- Volksblad