Brandstigting by munisipale kantore vermoed
2012-02-02 14:55
Durban – Die munisipale streekkantore in Mkuze, KwaZulu-Natal, is Donderdag dalk met opset aan die brand gesteek, het amptenare gesê.
“Daar is ‘n sterk vermoede dat ‘n derde party die brand by die Umkhanyakude-streeksmunisipaliteit se kantore gestig het,” het Nomusa Dube, die LUR vir samewerkende regering, gesê.
Die munisipaliteit se vyf finansiële kantore in noordelike KwaZulu-Natal is verwoes in die brand wat Donderdag in die vroeë oggendure uitgebreek het.
Dube het gesê die brand het dieselfde tyd as ‘n ondersoek na wanadministrasie en finansiële wanbestuur, wat die munisipaliteit bankrot gelaat het, plaasgevind.
“Onder die omstandighede kan ons nie ‘n element van desperaatheid deur diegene wat moontlik blootgestel kon word en hul behoefte om enige bewyse wat moontlik hul skuld kan bewys uitsluit nie.”
Dit is nie verregaande om te dink 'n derde party is verantwoordelik vir die brand nie, het sy gesê.
Dube het gesê die munisipaliteit word ondersoek deur haar departement en ‘n span wat deur burgemeester Jeff Vilane aangestel is.
Die munisipale bestuurder en hoof-finansiële beampte is geskors toe die ondersoek ‘n paar maande gelede begin is.
Die ondersoek sal nie geraak word nie, aangesien die speurders reeds meeste van die bewyse het, het die LUR gesê.
– Volg Nuus24 op Twitter
- SAPA