Brandpad ruk handuit op wynplaas
2010-01-23 11:44
Ilse Krige
Worcester - Terwyl sy wingerd brand, moes ’n boer van die Slanghoekvallei naby Rawsonville van werknemers van CapeNature hoor daar “het ’n foutjie gekom”.
Pieter Hugo van Hugoskraal het gesê daar het verlede Maandag rondom 12:00 “so ’n rokie begin trek” op een van sy plase, Witelsrivier, wat aan die Bainskloofberge grens.
“Ek en my seun, Pietman, het onmiddellik soontoe gegaan. Dit is tóé dat daar ’n bakkie met twee manne aankom. Dié sê toe hulle is van Natuurbewaring en hulle het met ’n masjien gewerk wat ’n vonk gemaak het. En dit is dié ‘foutjie’ wat R150 000 se wingerdplante geëis het.”
Hugo het gesê dit is net die verlore cabernet sauvignon-oes wat die grootste skade is nie.
“Ek moet die wingerd nou uithaal en dit sou nog ’n goeie tien jaar se leeftyd oorhê. Dan praat ons van skade nader aan R2 miljoen,” het hy gesê.
Hugo het vertel Deon Rossouw, bewaringsbestuurder van die Limietberg-natuurreservaat, het aan hom bevestig sy mense was wel in die berg en hulle het in daardie tyd aan brandpaaie in die omgewing gewerk.
By navraag aan Rossouw, wat dié dag op die plaas opgedaag het toe die helikopters ontbied is om die vlamme te blus, het Rossouw Die Burger na Peter Viljoen, bestuurder van wateropvangs, verwys.
Hy het Die Burger weer na Marietjie Engelbrecht, kommunikasiebestuurder van CapeNature, verwys.
Haar enigste opmerking was: “Ongelukkig is ons tans besig met ’n interne ondersoek en kan geen kommentaar lewer oor die brand voordat dit (die ondersoek) afgehandel is nie.”
Hugo het gesê CapeNature behandel hom skielik asof hý die skuldige is.
“Peter Viljoen het my vandag (gister) gebel en gesê ek moet geduldig wees. En ook dat ek vir my ’n prokureur moet kry.
“Ek sou darem meer tegemoetkomendheid van hulle kant af verwag het. Hulle het nie toestemming gehad om op my grond te wees nie.
“Natuurbewaring behoort van beter te weet as om hierdie tyd van die jaar in die berge te werk met apparate wat vonke kan veroorsaak.”