Brand verwoes familie se huis in Bryanston
2010-07-30 19:57
Johannesburg – ‘n Familie het amper al hul besittings verloor nadat ‘n brand Vrydag by hul huis in Bryanston uitgebreek het, het die Gautengse paramedici gesê.
‘n Vrou en twee 18 maande oue kinders was in die huis toe dit aan die brand geslaan het.
Volgens Vanessa Jackson, ER24-woordvoerder, het hulle gevlug en is nie beseer nie.
“Gelukkig het die vrou kalm gebly en die kinders verwyder voordat die brand vererger het,” het sy gesê.
Brandweermanne kon slegs ‘n paar meubelstukke uit die vlamme red, het Jackson gesê.
Daar word beweer dat die brand op die dak ontstaan het.
Die oorsaak daarvan is nie bekend nie.
Volg Nuus24 op Twitter.
- SAPA