Brand vernietig groot deel van Agulhaspark
2009-12-30 06:46
Maygene de Wee
Kaap Agulhaspark - Byna twee derdes van die Kaap Agulhaspark het in die slag gebly in die vernietigende brand wat Donderdag bokant die dorpie Buffeljagsbaai naby Die Dam-vakansiegebied uitgebreek het.
“Dis amper 14 000 ha grond,” het Etienne Fourie, bestuurder van die park, gister gesê.
Volgens hom beslaan die park sowat 21 000 ha. “Wanneer die veld weer gaan herstel, weet ek nie.”
Gister was slegs die reuk van rook, asvaal sand, bome wat tot in hul wortels gebrand het en uitgebrande grensdrade die stille getuies van dié verwoesting.
Elders in die Overberg het verskeie brande gister steeds gewoed en het spanne brandslaners geswoeg om die vlamme onder beheer te bring.
G.W. Hermanus, munisipale bestuurder van die Overberg-distriksmunisipaliteit, het gesê die plaaswerker wat Saterdag in die hospitaal opgeneem is nadat hy erge brandwonde opgedoen het, het aan sy beserings gesterf.
John Europa (65) van die plaas Springfield het dié naweek gehelp om die brande se blus.
Op die plaas Buffelsjacht het Danel Strydom gesê hul inkomste is daarmee heen. “Ons het al Donderdagmiddag begin om vlamme hier langs die pad dood te slaan, maar dit het nie gehelp nie.”
Op die plase Bergplaas, Rietfontein, Ratelfontein en Springfield – almal deel van die Kaap Agulhaspark – het die veld gister nog plek-plek gebrand. By Pearly Beach het die brand omstreeks 15:00 weer opgevlam.
Riaan Jacobs, hoof van die Overstrand-munisipaliteit se brandweerdiens, het gesê dis ’n “binnekol” wat opgevlam het. “Daar is niemand in gevaar nie en ons het die brand onder beheer.”
By Hawston is vier helikopters ingespan nadat ’n veldbrand Maandagaand teen die berghange uitgebreek het. Jacobs het gesê hulle gebruik twee Oryx-helikopters van die lugmag, een van die Overstrand- en die Overberg-munisipaliteite, en ’n helikopter van Werk met Vuur om dié brand te blus. In die berggebied om Greyton en Genadendal was vyf spanne brandbestryders en ’n grondspan besig om die brand te bestry.
- Die Burger