Brand op skip laat bemanning skarrel
2010-10-09 06:28
Kaapstad - ’n Brand het op ’n Duitse vragskip sowat 24 seemyl (ongeveer 45km) van Kaap Columbine uitgebreek.
“In ’n stadium was die situasie taamlik wanhopig, maar die bemanningslede het daarin geslaag om die brand onder beheer te bring,” het mnr. Craig Lambinon, woordvoerder van die Nasionale Seereddingsinstituut (NSRI), gister gesê.
Die bemanning is meestal Filippyne en van die senior bemanningslede is vermoedelik Duitsers.
Teen gistermiddag laat het die brand steeds gesmeul. Die skip sal deur die bergingsmaatskappy Smit Amandla Marine na ’n hawe gesleep word, het me. Clare Gomes, ’n woordvoerder van die maatskappy, gesê. “Waarheen die skip gaan, sal afhang van die omvang van die skade.”
Dit is nog nie bekend wanneer die skip weggesleep sal word nie.
Die skip, die Boundary van die Rickmers-groep, was sowat 24 seemyl oos van Kaap Columbine toe die bemanning kort voor 09:00 hulp ontbied het nadat ’n brand in die enjinkamer uitgebreek het.
Die NSRI is daarheen en twee skepe daar naby is gevra om om te draai, het kapt. Peter Stowe, Saldanhabaai se hawekaptein, gesê.
Die Hermes Arrow, ’n Belgiese vragskip, was sowat vier seemyl daarvandaan en die Helles Pont Triumph, ’n olietenkskip, sowat ses seemyl.
“Toe die brand op sy ergste was, het die kaptein van die skip dit oorweeg om sy bemanning opdrag te gee om die skip te verlaat,” het mnr. Darius van Niekerk, stasiebevelvoerder van die NSRI in Mykonos, gesê. Die bemanning sou dan in hul eie bote en met die NSRI se boot op die toneel, die Spirit of Freemasonry, na die twee groter skepe gebring word.
Twee NSRI-vrywilligers het aan boord gegaan en die brand help blus. Die maritieme reddingskoördineringsentrum het om 13:00 bevestiging gekry dat die brand geblus is.
Die Boundary is 162 m lank en was van Durban na Walvisbaai onderweg.
- Die Burger