Brand saai verwoesting in St. Francisbaai
2012-11-12 07:00
Video - Brand by St. Francisbaai
Dié video van die brand by St. Francisbaai is omstreeks 18:00 geneem, toe sowat 10 wonings in ligte laaie was. Die brand het later versprei.
KYK
Johannesburg – Die brand wat meer as 100 huise in St. Francisbaai verwoes het, is onder beheer, het die Kouga-munisipaliteit Maandag gesê.
"Die brand is nou gedeeltelik geblus en dit hou geen bedreiging in vir ander huise nie. Ons het nog nie die finale getal nie, maar meer as 100 huise het afgebrand," het Laura-Leigh Randall, woordvoerder van die munisipaliteit, kort voor middernag in 'n SMS-boodskap gesê.
Brandbestryders het ure lank gespook om die brand, wat deur 'n sterk suidwestewind aangeblaas is, te blus.
Tien brandweerwaens is gebruik om die brand te blus en nóg versterkings van die Nelson Mandelabaai- en Koukamma-munisipaliteit is ingeroep om te help, het Randall gesê.
"Die oorsaak van die brand is nog nie bekend nie, maar die brand het omstreeks 17:30 by die Royal Wharf-ontwikkeling, wat meestal dorpshuise is, begin."
Inwoners in die gebied is gevra om hul huise te ontruim en ’n gesamentlike operasiesentrum by die plaaslike polisiekantoor sal die situasie monitor.
Die meeste van die huise in die gebied is vakansiehuise.
Geen sterftes of beserings is aangemeld nie.
Is jy in die gebied? Stuur jou foto's aan Nuus24.
– Volg Nuus24 op Twitter
- SAPA
