Brand eis al man se besittings
2011-08-23 08:51
Bloemfontein - ’n Man van Bloemfontein het Maandag in sak en as langs sy honde gesit nadat ’n veldbrand sy huis op ’n kleinhoewe buite Bloemfontein met al sy besittings vernietig het.
Die brand in Ribblesdale het ook twee pakhuise van ’n plaaslike sakeman en baie weiveld vernietig.
Die vernietigende brand, wat brandweermanne met sewe brandweerwaens ure geneem het om onder beheer te bring, het weens ’n sterk wind vinnig oor die kleinhoewe versprei.
Marius Jakobs (52) het net sy honde oor ná die brand.
Sy huis op Leslie Kussman (83) se hoewe in Tibbie Visserstraat, het afgebrand en al sy aardse besittings het in die slag gebly.
“Ek het alles verloor. Van die min wat ek gehad het, het ek nou boggerôl.”
Kussman, eienaar van FB Motor Spares, het twee pakhuise in die brand verloor.
Hy moes toekyk hoe ’n deel van sy sakeonderneming tot op die grond afbrand.
Volgens hom is dit onduidelik hoe die brand begin het.
Sy toekoms is onseker. Sy sakeonderneming is nie verseker nie.
“Ek het groot skade gely. Meer as R1 miljoen se motoronderdele het uitgebrand.”
Ronel Kleinhans wat die afgelope agt maande op Kussman se hoewe woon, het gesê sy het gebid en gehuil dat die brand nie naby haar woonplek kom nie, want sy het geen water om dit te blus nie.
’n Reddingstegnikus van die brandweer, Hentie van Vuuren, sê dit is nog nie duidelik hoe die brand begin het nie.
Geen diere, ander huise of ander strukture is deur die brand geraak nie.
Volg Nuus24 op Twitter.
- Volksblad